Qazaqstan musylmandary dini basqarmasy
Ǵulamalar keńesiniń
ÚNDEÝI
Beibitshilik pen kelisim, dostyq pen senim – adamzattyń asyl qundylyqtary. Qazaq eli – ejelden birligi jarasqan, tynyshtyǵy men beibit tirshiligi saqtalǵanel.Osy izgi, qasietti murany urpaqtan urpaqqa jetkizý árbir el azamatyna amanat!
«Islam» sóziboisuný, baǵyný, beibitshilik degendi bildiredi. Islam– jer betinde beibitshilik pen tynyshtyqty ornatý úshin Allanyń búkil adam balasyna túsirgen uly júiesi. Islam aqyl ielerin osy dúniede qýanysh pen shattyqqa, al aqirette máńgilik baqytqa keneltedi. Islam bizge jaratylysymyzdyń maqsatyn, Allanyń aldyndaǵy pendelik mindetterimizdi úiretedi. Sondai-aq jaqsy men jamandy, durys pen burysty, aram men adaldy ajyratyp, izgilikke bastaidy.
Aqtóbedegi lańkestik áreket qazaq eline orny tolmas qaiǵy-qasiret ákeldi. Qasietti Ramazan aiynda osyndai qaiǵyly jaǵdaidyń oryn alýy óte ókinishti jait. Bul – elimizdiń tynyshtyǵyn buzyp, bolashaǵymyzǵa balta shabý úshin ádeii uiymdastyrylǵan qaskóilik dep esepteimiz. Osy qantógiste qaza tapqandardyń otbasylary men týǵan-týysqandaryna qaiǵylaryna ortaqtasyp shyn júrekten kóńil aitamyz. Sondai-aq bulqandy oqiǵanyń asyl dinimiz Islamǵa eshqandai qatysy joq ekenin málimdeimiz.
Alla Quran Kárimde:
وَلاَ تُفْسِدُواْ فِي الأَرْضِ بَعْدَ إِصْلاَحِهَا
«Jer betinde tynyshtyq ornaǵannan keiin búlik jasamańdar» («Aǵraf» súresi, 56-aiat) dep qatań eskertedi. Sondai-aq kelesi aiatta:
مَنْ قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا
«Kimde-kim kisi óltirmegen nemese jer betinde buzaqylyq jasamaǵan bireýdi óltirse, ol barlyq adamdy óltirgenmen teń. Al kim ony tiriltse (ólimnen qutqarsa) barlyq adamdy tiriltkenmen teń»(«Máidá»súresi, 32-aiat) dep baiandaidy.
Sonymen qatar múmindi qasaqana óltirýdiń jazasy máńgilik tozaq ekendigin:
ومن يقتل مؤمنا متعمدا فجزاؤه جهنم خالدا فيها
«Kimde-kim múmin pendeni qasaqana óltirse, onyń jazasy máńgilik tozaq...»(«Nisa»súresi, 93-aiat) dep buiyrady.
Paiǵambarymyz (Oǵan Allanyń salaýaty men sálemi bolsyn):
المسلم من سلم الناس من لسانه ويده
«Naǵyz musylman ózgelerge tilimen de qolymen de ziian keltirmeidi» deidi.
Biz, QMDB Ǵulamalar Keńesiniń músheleri, qasietti Ramazan aiynda Aqtóbede oryn alǵan lańkestik áreketti qatań aiyptaimyz. Qazaqstan halqyn qoǵamda tynyshtyq ornatýǵa, lańkestik áreketterge tosqaýyl bolýǵa, jalpyǵa ortaq adamgershilik qundylyqtardyń nasihattalýyna úles qosýǵa úndeimiz.
