Grýziianyń Kahetiia óńirindegi qonaqúide reseilik týristke shabýyl jasady degen kúdikpen 30 jastaǵy er adam ustaldy, dep habarlaidy dalanews.kz.
Oqiǵa Agarani Estate qonaqúiinde bolǵan. Reseiden kelgen birneshe áiel qurbysynyń týǵan kúnin atap ótý úshin qonaqúige toqtaǵan. Olardyń aitýynsha, bólmesiniń balkonynda shampan ashyp turǵan sátte beitanys er adam ishke basyp kirip, olardyń birin bet tusynan uryp jibergen. Saldarynan áieldiń murny synyp, aýrýhanaǵa jetkizilgen.
Al Grýziia Ishki ister ministrliginiń málimetinshe, janjalǵa týristerdiń ózderi sebep bolǵan. Vedomstvonyń nusqasy boiynsha, olar qonaqúi aýmaǵynda ótip jatqan úilený toiynyń qonaqtaryn balaǵattap, mýzykalyq qurylǵylarǵa sý shashqan.
Alaida týrister bul aiyptaýlarmen kelispeidi. Olar ózderine shabýyldyń sebebi orys tilinde sóilegenderi bolǵanyn aitady. Sondai-aq qonaqúi qyzmetkerleri shabýyl jasaǵan adamǵa olardyń bólme nómirin aityp bergenin jáne oqiǵa qoǵamda keńinen talqylana bastaǵannan keiin áleýmettik jelidegi akkaýnttaryn buǵattaǵanyn málimdedi.
Kúdikti politsiianyń qolyna tústi. Eger kinási dáleldense, oǵan úsh jylǵa deiin bas bostandyǵynan aiyrý jazasy taǵaiyndalýy múmkin.
