Grekiia iahtada júrip órt shyǵardy degen qazaqstandyqtarǵa aiyp taqty, dep habarlaidy Dalanews.kz.
Iahtada bolǵan eki kámeletke tolmaǵan balaǵa aiyp taǵylmaǵan. Grekiia biligi qazaqstandyq bilikten kómek suraǵan. Sebebi iahtany jalǵa alǵan qazaqstandyqtar jaýap alynbai, elden ketip qalǵan kórinedi.
Oqiǵa ornynda prokýror taǵaiyndaǵan sot-meditsinalyq saraptama kezinde segiz qazaqstandyqtyń kinási dáleldengendikten olarǵa aiyp taǵylǵan. Keibir habarlar boiynsha, órtsóndirýshiler ailaqtan otshashýdyń qaldyqtaryn taýyp alǵan.
Sonymen qatar, iahtanyń kapitany men birinshi kómekshi de ustalǵan. Ekipiajdyń qalǵan músheleri bosatylǵan.
Aita keteiik, Organized Crime and Corruption Reporting Project derekteriniń málimetinshe, órtengen aral janyndaǵy iahtada Halyk Bank basshysy Úmit Shaiahmetova men oligarh Daniiar Abylǵazin bolǵan.
Derekterge súiensek, oqiǵa Grekiianyń basty týrizm ortalyqtarynyń birinde bolǵan. Aralǵa demalýǵa kelgender iahtadan otshashý atqan, artynsha bul orman órtine sebep bolǵan. Gidra meri Giorgos Kýkýdakis ákimshilik órtti uiymdastyrǵan sheteldikterdi sotqa berýge nietti ekenin de aitqan.
OCCRP(Sybailas jemqorlyq pen uiymdasqan qylmysty zertteý ortalyǵy) málimetinshe, bortta bolǵan Qazaqstannyń tanymal azamattary kelesi kúni jeke ushaqpen elden qashyp ketken.
"Órt Gidra aralyndaǵy 300 000 sharshy metr aýmaqty sharpydy. Ulttyq órt sóndirý bólimi ókilderi órtke qarsy bólimshe grek ekipajynyń 13 múshesin tutqyndaǵanyn habarlady. Alaida aptasyna 250 000 eýroǵa jalǵa alýǵa bolatyn sándi iahtadaǵy qonaqtardyń eshqaisy ustalmaǵan", - dep jazylǵan derekte.
Qala meri "mýnitsipalitet kinálilerge qatysty sharalar qabyldaý jáne ótemaqy talap etý úshin tergeýdiń sońǵy nátijelerin kútip otyrǵanyn" aitqan.
"Persefone I" iahtasynyń qonaqtary arasynda jeti qazaqstandyq bolǵan. Olardyń arasynda Qazaqstannyń eń bai adamdarynyń biri Daniiar Abylǵazin de boldy. Órtten keiingi kúngi ushý týraly jazbalar Abylǵazin únemi paidalanatyn jeke ushaq Afina áýejaiynan Qazaqstannyń eń iri qalasy Almatyǵa ushqanyn kórsetedi", - dep jazylǵan málimette.
Abylǵazin bul jaǵdaiǵa eshqandai pikir bildirmegen. Keme deklaratsiiasynda bortta Abylǵazinniń uly men onyń áieli Aidana Súleimenova bolǵany da kórsetilgen.
OCCRP málimetterinde qonaqtardyń qatarynda Qazaqstannyń iri qarjy mekemesiniń, Halyq bankiniń bas direktory Úmit Shaiahmetova da boldy degen aqparat bar. Tizimde onyń kúieýi Beiimbet Shaiahmetov te bar, ol - KMG International NV ulttyq munai kompaniiasynyń burynǵy top-menedjeri.
OCCRP túsinikteme alý úshin Súleimenovaǵa da, Shaiahmetovaǵa da júgingen, biraq olardyń eshqaisy jaýap bermegen.
Abylǵazin de, Shaiahmetova da Nursultan Nazarbaevtyń kúieý balasy Timýr Qulybaevpen tyǵyz bailanysta. Abylǵazin Qulybaevtyń birneshe kompaniiadaǵy seriktesi boldy. Al Shaiahmetova Qulybaevqa tiesili bankte jumys isteidi.
