Elimizdegi týrısik ortalyqtar men Túrkistan qalasyndaǵy "Áziret Sultan" memlekettik tarıhı-mádenı qoryq-mýzeıiniń Jerorta teńizi aımaǵyndaǵy eń iri týrısik kórmege qatysýyna Qazaqstan Respýblıkasynyń Mádenıet jáne sport mınıstrligi men Qazaqstannyń Grekıadaǵy elshiligi qoldaý kórsetti.
Óz kezeginde "Áziret Sultan" memlekettik tarıhı-mádenı qoryq-mýzeıi Qoja Ahmet Iasaýıdiń muralary jáne Túrkistan óńirindegi kıeli-tarıhı jerler jaıly kórmeni sheteldikter nazaryna usyndy.
Týrıser úshin Túrkistandaǵy eń mańyzdy oryndar jaıly 1871-1872 jyldary túsirilgen A.Kýnnyń fotoalbomynan týyndylar jáne keseneniń ár jyldardaǵy beıneleri men Túrkistannyń kórinisteri, taıqazan, shyraǵdan sýretteri, Qoja Ahmet Iasaýı men taıqazannyń maketteri tanystyrylsa,
Iasaýı kesenesi men Qylýet jerasty meshiti, Shyǵys monshasy, Gaýhar ana, Ýkasha ata kesenesi men qudyǵy, Saýran qalashyǵy syndy tarıhı oryndardyń 3D týr nusqasy Elbasymyzdyń sıfrlandyrý júıesi negizinde daıyndalyp, halyqaralyq kórmede alǵash ret kózildirik arqyly kórsetildi.
Sonymen qatar, qoryq-mýzeıdiń tarıhı oryndary men mýzeı haqynda úsh tilde jaryq kórgen býklet kitapshalary men jádigerlerdiń katalog kitaptary da kórme ekspozısıasynan oryn aldy.
Sonymen qatar, otandyq týrısik ortalyqtar «Qazaqstanǵa saıahat jasa» jarnamalyq uranymen túrli mádenı baǵdarlama usynyp, elimizdiń kórikti jerlerimen birge qazaqtyń salt-dástúr, ádet-ǵurpy jáne tól ónerimen tanysty.
Qazaqtyń dástúrli ánderi men termesin tyńdaǵan qalyń kópshilik arqan tartyp, asyq atý oıynyna da belsene qatysty.
Úsh kún ishinde 20 myńnan asa sheteldik tamashalap úlgergen qazaqstandyq kórmege 27 jyl buryn Qazaqstannan Grekıaǵa qonys aýdarǵan Georgıı jáne Olga esimdi erli-zaıyptylar kelip, týǵan jer muralaryn kórip, kózderine jas aldy.
– Qazaqstandyq kórme jóninde teledıdardan estip Salonıkı qalasynan 70 shakyrym jerden arnaıy keldik. Qazaqstandy kórmegenimizge de 10 jylǵa jýyqtady. Janymyz grek bolǵanymen - júregimiz qazaq. Týǵan jerdi qatty saǵyndyq. Baýyrsaqtan dám tatyp, ózimizge tanys jerlerdiń sýretin tamashalap, qazaq jurtynyń ystyq yqylasy, mol meıirimi qosa jetkendeı erekshe sezimge bólendik, - dedi Georgıı.
