Glýbokoe aýdanynda maily daqyldardy óńdeitin zaýyt ashylady
Kásiporyn iske qosylǵannan keiin mai ónimderin óndirip, taýaryn Qazaqstanǵa naryǵyna shyǵaratyn bolady. Maily daqyldardy óndeitin zaýyttyń iske qosylýy aýdannyń ekonomikalyq-áleýmettik ómirine oń ózgeris ákelmek.
"Qarapaiym buiymdar ekonomikasy" baǵdarlamasynyń sheńberinde ashylǵaly otyrǵan kásiporynnyń qurylysyn «Altyn Shyghys» JShS-y júrgizýde.
Jobanyń quny 28 mlrd 781 mln teńgeni quraǵan. Atalǵan qarajatqa mai óndirýge qajetti qurylǵylar satyp alynady. Zaýyt kúnine 1,5 tonna maily daqyl óńdeitin qýatqa ie bolmaq. Al shikizatty jergilikti sharýalardan satyp alady. Sonymen qatar kórshiles óńirlerdiń kásipkerleri de kúzdik ónimin zaýytqa ótkize alady.
ShQO Aýyl sharýashylyǵy basqarmasynyń ókilderi atap ótkendei mundai deńgeidegi kásiporynnyń ashylýy óńir ekonomikasyna da oń áserin tigizbek.
"Kúnbaǵys daqylyn jinaý jóninen Shyǵys Qazaqstan oblysy el kóleminde kósh bastap tur. Jylyna 500 myń tonna shekildeýik jinalady. Ashylǵaly otyrǵan kásiporyn maily daqyldarmen ainalysatyn sharýalarǵa septigin tigizip, olardyń jumysyna serpin bereri sózsiz. Eń bastysy zaýyt aýdan turǵyndaryn jumyspen qamtidy", – deidi oblystyq Aýyl sharýashylyǵy basqarmasynyń ókilderi.
Keshen tolyq iske qosylǵanda 140 adam turaqty jumysqa ornalasady. Al óńirdegi maily daqyldar óndirisi jylyna 300 myń tonnaǵa deiin artqaly otyr. Kásiporynnyń tabysy molaiǵanda biýdjetke túsetin túsimniń de kóbeietini beseneden belgili.
"Kásiporynǵa qurylysyna jumsalǵan qarajatty 7 jyldyń ishinde aqtap alýdy kózdep otyrmyz. Barlyǵy naryqtaǵy ahýalǵa bailanysty. 2022 jyly mai syǵymdaýdy, al 2023 jyly tazartý jumystaryn bastap ketemiz. Bolashaqta kásiporyn aiasynda taýardy eksportqa shyǵaratyn logistikalyq hab qurý oiymyzda bar", – deidi «Altyn Shyghys» JShS-dy ókili Pavel Pisarenko.
Mai óndirýge qajetti qurylǵylar qazirdiń ózinde jetkizilip qoiǵan. Qurylystyń jalpy aýmaǵy 5,5 ga alyp jatyr. Logistikany jolǵa qoiý úshin temir jol toraby da júrgizilgen.
