2025 jyldyń 19 mamyrynda «Ǵylym ordasy» respýblıkalyq memlekettik kásipornynyń bas dırektory Ular Muqajanov bastaǵan delegasıa Iran Islam Respýblıkasynyń astanasy – Tegeran qalasyndaǵy úsh iri mádenı mekemede resmı saparmen boldy. Bul sapar eki el arasyndaǵy ǵylymı, mádenı jáne arhıv salalaryndaǵy ózara seriktestikti nyǵaıtýǵa jáne yntymaqtastyqty jańa deńgeıge kóterýge baǵyttalǵan, dep habarlaıdy Dalanews.kz
Delegasıanyń alǵashqy aıaldamasy – Irannyń alǵashqy jekemenshik mýzeıi retinde tanylǵan Malek ulttyq mýzeıi men kitaphanasy boldy. 1937 jyly qajy Hýseın Malek tarapynan negizi qalanǵan bul mekeme búginde Quds Razavı ortalyǵynyń qaramaǵynda qyzmet etedi. Mýzeı men kitaphana sırek qoljazbalar men tarıhı jádigerlerdiń baı qoryna ıe. Sapar barysynda delegasıa mýzeıdiń qurylymymen, kitap qoımasymen jáne zerthanasymen tanysyp, aldaǵy ýaqytta birlesken is-sharalar uıymdastyrý máseleleri boıynsha kelisimge keldi.
Kelesi kezdesý Islam mádenıeti jáne qarym-qatynas uıymynda ótti. Onda taraptar ǵylymı, mádenı jáne bilim berý salalaryndaǵy yqtımal yntymaqtastyq pen birlesken jobalar týraly pikir almasty. Sonymen qatar, eki el arasyndaǵy mádenı jáne ǵylymı qarym-qatynastardy odan ári keńeıtý máseleleri qarastyryldy.
Sapar aıasyndaǵy úshinshi nysan – «Nýr» halyqaralyq mıkrofılmder ortalyǵy boldy. Bul mekeme kitap sıfrlandyrýy men restavrasıa salasynda mol tájirıbege ıe. Kezdesý barysynda taraptar restavrasıa jáne konservasıa salasyndaǵy daıyndyq kýrstaryn uıymdastyrý, kodıkologıalyq zertteýler júrgizý, sondaı-aq Almaty qalasynda Yntymaqtastyq týraly memorandýmǵa qol qoıý jóninde ýaǵdalasty.
«Ǵylym ordasy» ókilderiniń Tegeran qalasyna sapary Qazaqstan men Iran arasyndaǵy ǵylymı jáne mádenı baılanystardy nyǵaıta otyryp, eki eldiń mádenı murasyn saqtaý jáne damytý baǵytynda birlesken jobalardy júzege asyrýǵa yqpal etetin bolady.
