Jáńgir han atyndaǵy Batys Qazaqstan agrarlyq-tehnikalyq ýniversitetinde ótken «Ǵylym men innovatsiia – el ekonomikasyn damytýdyń tetigi» atty baspasóz májilisinde ǵylym men joǵary bilim salalary boiynsha atqarylǵan ister men aishyqty jobalar, olardyń agrarlyq salany damytýǵa jáne el ekonomikasyn ilgeriletýge tigizetin paidasy, nátijeleri sóz boldy.
Jiynǵa ýniversitettiń basqarma tóraǵasy-rektory Asqar Nametov, prorektorlar, ǵalymdar, ǵylymi baǵytta selektsiialyq jumystar júrgizilgen sharýashylyqtardyń ieleri jáne BAQ ókilderi qatysty. Aldymen sóz alǵan ýniversitet basshysy Asqar Myrzahmetuly:
– Memleket basshysy jýyrda Ǵylym ordasynda ǵalymdarmen ótken kezdesýinde «Aýyl sharýashylyǵyndaǵy barlyq múmkindikti iske asyrý maqsatynda eńbek ónimdiligin edáýir arttyrý qajet. Sondyqtan agrarlyq ǵylymdy damytýdyń, agroónerkásip keshenine zamanaýi tehnologiialardy engizýdiń máni zor» dep, agrarlyq ǵylym salasyna basymdyq bergen bolatyn. Qazirgi ýaqytta ekonomika azyq-túlik qaýipsizdigi, ashtyqpen kúres, klimattyq ózgerister syndy álemdik daǵdarystardyń yqpalynan jáne tsifrlandyrý, jasandy intellekt sekildi jańa baǵyttardyń engizilýine bailanysty jańa betburystarǵa qadam basýda.
Agrarlyq ǵylymnyń ǵylymi jetistikteri de ekonomikadaǵy osyndai ózgeristerge jáne memlekettiń júrgizip otyrǵan saiasatyna baǵyttalýda. Osy rette bizdiń ýniversitetimizdiń ǵalymdary elimizdiń aýyl sharýashylyǵyn, agrarlyq ǵylymyn damytýda qomaqty ǵylymi jetistikterge qol jetkizdi, – dei kele, osy saiasatty iske asyrý úshin ýniversitet basymdyq bergen negizgi baǵyttarǵa toqtaldy. Aitýynsha, ýniversitet ǵalymdary ǵylymi dárejedegi zertteýlermen shektelmei, ǵylymi izdenisterin ekonomikaǵa baǵyttaýda jáne onyń birneshe tásilderin qoldanýda. Sonymen qatar joǵary oqý orny óz infraqurylymyn ózgertip, ǵylymi zerthanalardyń jumysyn kásiptik baǵytqa beiimdep, ǵylymi dárejede qyzmet kórsetýge kóshken.
Jáńgir han ýniversitetiniń ǵalymdary sýdy únemdeý, jaiylymdylyq jerlerdi sýlandyrý, tiimdi jáne ekologiialyq jaǵynan taza mal sharýashylyǵyn qurý, qoi júnin paidaǵa asyrý sekildi elimiz boiynsha ózekti máselelerdi ǵylymi jolmen sheshýge atsalysýda. Mysaly, qus sharýashylyǵyn damytý maqsatynda úirektiń jańa krosyn ashyp, olardy Petropavl qalasyndaǵy «Beskól» qus fabrikasyna engizgen. Búginde úirektiń jańa krostary sol óńirde satylýda. Al ýniversitet ǵalymdary
úirekterdiń qazaqstandyq tuqymyn ashý baǵytynda jumys jasaýda.
Sondai-aq BQATÝ ǵalymdary sońǵy úsh jylda iri qara ósirýmen ainalysatyn 15 sharýashylyqta selektsiialyq jumystar júrgizgen. Endi jasandy uryqtandyrý jolymen jappai asyldandyrý jumystaryna kirisýde. Al jaiylymdyq jerlerdi qalpyna keltirý, qunarlylyǵyn arttyrýdy birneshe sharýashylyqqa engizip, iske asyrǵan.
Jem-shóp daqyldary máselesin de qolǵa alǵan ǵalymdar olardyń tiimdiligin ári qunarlylyǵy joǵary bolýyn júzege asyrý maqsatynda shetelden dándi daqyldardyń túrli sorttaryn oblysymyzǵa ákelip, onyń jergilikti jerge beiimdiligin tekserýde. Zertteý baǵyttarynyń taǵy biri – maldyń tóli týa salysymen genotipteý negizinde oldardyń mýtatsiialyq ózgergishtigin, taza tuqymdylyǵyn, aýrýlarǵa tózimdiligin, ónimdilik qasietterin anyqtaý. Júrgiziletin zertteýler mal tabyndaryn qurýdyń teoriialyq jáne praktikalyq aspektilerin keńeitýde úlken mańyzǵa ie, sebebi asyldandyrý salasyndaǵy jańa selektsiialyq sheshimder negizinde qarqyndy tipti mal ósirýge múmkindik týady.
Ǵalymdar jerasty sýlaryn sharýashylyqqa jáne turmysqa paidalanýǵa qoljetimdi etý úshin sýdy arnaiy sorbentter arqyly súzgiden ótkizip, onyń quramyndaǵy kermektiligi men tuzdylyǵyn azaitý baǵytynda ǵylymi jumystar júrgizgeni de aityldy.
Rektor óz baiandamasynda ýniversitet kadr daiarlaý máselesinde de elimizdegi ekonomikalyq ózgeristerdi eskere otyryp, bolashaq mamandardyń kásibi quzyrettiligi men daǵdylaryn qalyptastyrý maqsatynda bilim berý salasyna ózgerister engizilgenin jetkizdi. Zaman talabyna sai bilim berý júieleri engizilip, sonymen birge kásipkerlik bilim berilip, bitirýshi túlekterdi keiin óziniń biznesin ashatyndai nemese iri biznes kompaniialarda jetekshi maman qyzmetin atqara alatyndai dárejege baǵyttaýda. – Jáńgir han ýniversitetiniń qyzmeti memleketpen jáne agrarlyq-tehnikalyq beiindegi biznes indýstriiasynyń ókilderimen ózara is-qimylǵa negizdelgen.
Ýniversitetti damytýdyń negizgi baǵyttary – agroónerkásiptik keshen salasyndaǵy innovatsiialyq zertteýler jáne bilim men ǵylymdaǵy zamanaýi aqparattyq tehnologiialar bolyp tabylady. Óńirimizdegi iri kásiporyndarmen jáne óndiris oshaqtarymen túrli baǵytta kelisimsharttarǵa otyryp, óz maqsat-múddelerimizdi iske asyryp kelemiz, – dedi rektor A.Nametov.
Baspasóz májilisinde jýrnalister tarapynan qoiylǵan suraqtar da jaýapsyz qalmai, ǵylymi jobalar boiynsha qosymsha aqparattar berildi.
