Qazaqstandaǵy jetekshi saiasi kúshterdiń biri Amanat partiiasy jańadan qurylǵan «Ádilet» partiiasymen yqtimal birigý máselesin talqylap jatyr. Bul týraly BES.media basylymyna Májilis depýtaty, Amanat partiiasy Saiasi keńesi biýrosynyń múshesi Erlan Sairov málimdedi, dep habarlaidy dalanews.kz.
Onyń aitýynsha, 6 maýsym kúni ótken partiianyń shuǵyl saiasi keńes otyrysynda «Ádilet» partiiasymen yqtimal saiasi birigý máselesi qaralǵan.
«Qazir saiasi keńes músheleriniń basym bóligi saiasi birigýdi qoldap otyr. Meniń oiymsha, mundai sheshim qabyldanýy múmkin. Alaida túpkilikti sheshimdi partiia sezi qabyldaidy. Saiasi keńes músheleriniń kópshiligi prezidentti qoldaityn elektorattyń bólinbeýi kerek degen ustanymda», – dedi Erlan Sairov.
Depýtattyń sózinshe, qazirgi kezeńde prezidenttik reformalardy qoldaityn saiasi kúshterdiń shoǵyrlanýy mańyzdy. Sondyqtan aldaǵy ýaqytta eki partiianyń birigý yqtimaldyǵy joǵary baǵalanyp otyr.
Aita keteiik, qazirgi tańda Qazaqstanda resmi túrde segiz saiasi partiia tirkelgen. Olardyń qatarynda Amanat, «Aq jol», Jalpyulttyq sotsial-demokratiialyq partiia, «Respýblika», Qazaqstan halyq partiiasy, «Aýyl», «Baitaq» jáne «Ádilet» partiialary bar.
«Ádilet» partiiasynyń qurylǵany biyl 15 sáýirde jariialanǵan bolatyn. Kelesi kúni partiianyń bastamashyl toby Ádilet ministrligine memlekettik tirkeý úshin qujattaryn tapsyrdy.
Partiia tóraǵasy bolyp Prezident Ákimshiliginiń burynǵy basshysy Aibek Dádebai sailandy. Partiianyń saiasi keńesiniń quramyna «Qazaqtelekom» basqarma tóraǵasy Baǵdat Mýsin, Bala quqyqtary jónindegi ýákil Dinara Zákieva, kásipker Andrei Lavrentev, saiasattanýshy Marat Shibutov, qoǵam qairatkeri Raýan Kenjehanuly jáne AHQO basqarýshysy Renat Bekturov kirgen.
Eger birigý týraly sheshim qabyldansa, bul sońǵy jyldardaǵy Qazaqstannyń partiialyq keńistigindegi eń mańyzdy saiasi oqiǵalardyń birine ainalýy múmkin.
