Қазақстандағы жетекші саяси күштердің бірі Amanat партиясы жаңадан құрылған «Әділет» партиясымен ықтимал бірігу мәселесін талқылап жатыр. Бұл туралы BES.media басылымына Мәжіліс депутаты, Amanat партиясы Саяси кеңесі бюросының мүшесі Ерлан Саиров мәлімдеді, деп хабарлайды dalanews.kz.
Оның айтуынша, 6 маусым күні өткен партияның шұғыл саяси кеңес отырысында «Әділет» партиясымен ықтимал саяси бірігу мәселесі қаралған.
«Қазір саяси кеңес мүшелерінің басым бөлігі саяси бірігуді қолдап отыр. Менің ойымша, мұндай шешім қабылдануы мүмкін. Алайда түпкілікті шешімді партия съезі қабылдайды. Саяси кеңес мүшелерінің көпшілігі президентті қолдайтын электораттың бөлінбеуі керек деген ұстанымда», – деді Ерлан Саиров.
Депутаттың сөзінше, қазіргі кезеңде президенттік реформаларды қолдайтын саяси күштердің шоғырлануы маңызды. Сондықтан алдағы уақытта екі партияның бірігу ықтималдығы жоғары бағаланып отыр.
Айта кетейік, қазіргі таңда Қазақстанда ресми түрде сегіз саяси партия тіркелген. Олардың қатарында Amanat, «Ақ жол», Жалпыұлттық социал-демократиялық партия, «Республика», Қазақстан халық партиясы, «Ауыл», «Байтақ» және «Әділет» партиялары бар.
«Әділет» партиясының құрылғаны биыл 15 сәуірде жарияланған болатын. Келесі күні партияның бастамашыл тобы Әділет министрлігіне мемлекеттік тіркеу үшін құжаттарын тапсырды.
Партия төрағасы болып Президент Әкімшілігінің бұрынғы басшысы Айбек Дәдебай сайланды. Партияның саяси кеңесінің құрамына «Қазақтелеком» басқарма төрағасы Бағдат Мусин, Бала құқықтары жөніндегі уәкіл Динара Зәкиева, кәсіпкер Андрей Лаврентьев, саясаттанушы Марат Шибұтов, қоғам қайраткері Рауан Кенжеханұлы және АХҚО басқарушысы Ренат Бектұров кірген.
Егер бірігу туралы шешім қабылданса, бұл соңғы жылдардағы Қазақстанның партиялық кеңістігіндегі ең маңызды саяси оқиғалардың біріне айналуы мүмкін.
