Kóktem men jazda jambyldyqtar eki márte iri jer silkinisin sezdi. 28 naýryzda túnde Jambyl oblysynyń birqatar aýdany men Taraz qalasynda jer silkinisi tirkeldi, kúshi 5 balǵa jetti. Kúni keshe taǵy da bir jer silkinisi tirkeldi, al onyń kúshi 6 balǵa deiin jetti. Áleýmettik jelide jer silkingen sáttiń túrli videolary tarap jatyr. Ǵalymdar bul qubylysty erte boljai ala ma? Qazaqstandyq ǵalym osy jáne ózge de saýaldarǵa jaýap berdi, - dep habarlaidy Dalanews.kz.
Álemde syry ashylmaǵan, jumbaǵy sheshilmegen qubylys kóp. Sonyń biri - jer silkinisi. Áli kúnge ǵalymdar jer silkinisin aldyn ala boljaý tásilin oilap tapqan joq.
Belgili ǵalym, akademik, ǵylym doktory, oqýlyqtardyń avtory, Seismologiia institýtynyń burynǵy direktory Tańatqan Abaqanov Tengrinews.kz-ke bergen suhbatynda "adamzat kúnderdiń kúninde jer silkinisin boljai ala ma?" degen saýalǵa jaýap bergen.
"Jer silkinisin boljaý – búkil adamzat úshin asa mańyzdy másele. Bul salada ǵylymi kózqaras pen naqty teoriialar tek 1900 jyly Japoniia ǵalymdarynyń eńbegimen qalyptasa bastady. Iaǵni bar bolǵany 125 jyl ǵana ótti. Bul turǵyda meditsina salasyn mysalǵa keltirýge bolady. 1967 jyly Keiptaýnda (Ońtústik Afrika Respýblikasy) hirýrg alǵash ret 25 jastaǵy áieldiń júregine sátti ota jasady. Ol kezde bul meditsina úshin sensatsiialyq oqiǵa boldy, kópshilik ony kezdeisoqtyqqa balap, "múmkin emes" dep senbegen. Al búginde Astanada júrekke júzdegen ota sátti jasalyp jatyr. Málimetterdi jinap, olardy taldap, naqty qorytyndy jasaý ǵalymdardyń jaýapkershiliginde. Bul ýaqytty talap etedi, óitkeni jer – tiri organizm sekildi", – dep túsindirdi ǵalym.
"Almatyda aldaǵy 10 jylda joiqyn, 10 baldyq jer silkinisi bola ma?" degen saýalǵa akademik bylai jaýap berdi:
"Mundai suraqqa eshbir ǵalym naqty jaýap bere almaidy. "Iá, bolady" nemese "joq, bolmaidy" dep nyq aitý – tek psihologiialyq aýytqýy bar adamnyń áreketi bolar edi", - deidi ol.
- QR TJM komandalyq ortalyǵy - 87172-55-96-21
- Jambyl oblysy TJD 8-7262-51-41-67.
