G7 elderiniń kóshbasshylary Reseidiń munai-gaz sektoryna qatysty sanktsiialyq qysymdy kúsheitý týraly kelisimge keldi, dep habarlaidy dalanews.kz.
Bul týraly Frantsiiada ótken sammit qorytyndysy boiynsha jariialanǵan birlesken málimdemede aitylǵan.
Sonymen qatar G7 memleketteri Ýkrainaǵa áýe shabýylyna qarsy qorǵanys júielerin, tosqaýyl qoiýshy zymyrandardy jáne alys qashyqtyqqa arnalǵan qarý-jaraq jetkizýdi ulǵaitýǵa ýaǵdalasty.
Málimdemede AQSh pen Iran arasynda Ormýz buǵazy arqyly keme qatynasyn qaita jandandyrý jóninde jasalǵan kelisim Reseige qarsy qosymsha sanktsiialar engizýge qolaily jaǵdai qalyptastyrǵany atap ótilgen.
«Biz Ýkrainaǵa áýe qorǵanysy quraldaryn, qosymsha júieler men tosqaýyl qoiýshy zymyrandardy, sondai-aq alys qashyqtyqtaǵy qarý-jaraqty jetkizýdi arttyrý týraly kelistik. Sonymen birge Ýkrainaǵa óz áskeri óndirisin keńeitýge múmkindik beretin litsenziialar berý máselesin qarastyrýǵa daiynbyz.
Biz Ýkrainanyń energetikalyq júiesiniń turaqtylyǵyn qamtamasyz etýdiń mańyzyn atap ótemiz. Ýkraina biligi belgilegen qajettilikter men basymdyqtardy eskere otyryp, eldiń aldaǵy qystan aman shyǵýyna kómektesý úshin qosymsha qoldaý kórsetýge kelistik.
Sondai-aq Reseidiń áskeri ekonomikasyna qysymdy kúsheitýge mindettenemiz. Osyǵan bailanysty munai-gaz sektoryna qatysty shekteýlerdi qosa alǵanda, sanktsiialardy qatańdatamyz. Qazir qosymsha sharalar qabyldaýǵa qolaily kezeń dep sanaimyz, óitkeni prezident Donald Tramp qol jetkizgen jáne biz qoldaityn kelisim Ormýz buǵazy arqyly keme qatynasynyń qaita jandanýyna múmkindik berdi», – delingen málimdemede.
Bloomberg agenttiginiń málimetinshe, jańa sanktsiialar Reseidiń energetikalyq eksporttan túsetin tabysyn azaitýǵa jáne onyń áskeri ekonomikasyna qysymdy kúsheitýge baǵyttalǵan.
