BCC Invest sarapshylary Qazaqstan ekonomıkasynda "qyzyp ketý" jáne qurylymdyq tepe-teńdiktiń buzylýy sekildi qaýip belgileri baryn eskertedi, dep habarlaıdy Dalanews.kz.
"2024 jylǵy ekonomıkalyq ósimniń negizgi draıveri ishki tutynýshylyq suranys boldy, ıaǵnı saýda-sattyq JİÓ-niń jalpy ósiminde úshten bir úleske ıe (...). Demek, negizgi úles óndiristiń naqty ósimi esebinen emes, tutynysty yntalandyrý arqyly kelýde. Ekonomıkanyń "qyzyp ketýi" naqty JİÓ-niń áleýetti deńgeıden asyp túsýimen de rastalady. Al bul jaǵdaı ınflásıanyń ósýine jáne sonyń saldarynan bazalyq mólsherlemeniń odan ári arttyrýǵa ákelip soǵýy múmkin. Iaǵnı, halyq pen zańdy tulǵalarǵa arnalǵan nesıeler odan saıyn qymbattaıdy", delingen BCC Invest baıandamasynda.
Eger JİÓ ósimi qurylymynda tutynýǵa qatysty teńgerimsizdik ary qaraı kórinis taba beretin bolsa, bul otandyq óndiriske teris áser etedi.
"Al "fıskaldyq yntalandyrýǵa shamadan tys táýeldilik" qatty daǵdarys jaǵdaıynda Úkimettiń memlekettik qoldaý sharalaryn júrgizý múmkindigin shekteýi yqtımal. Óıtkeni aıtarlyqtaı qarajat qazirdiń ózinde ártúrli yntalandyrý maqsattaryna jumsalýda. Bul rette ótken jylǵy "Ónimder men ımport salyqtary" kórsetkishi baıaýlaý satysynda, bul salyq tólemderiniń qysqarǵanyn jáne kem degende óndiristerdiń tejelisin baıqatady. Bul, ásirese ımportqa baǵdarlanǵan salalarda iskerlik belsendiliktiń tómendeýi nemese ımporttalatyn taýarlar tutynysy kóleminiń azaıýyn tanytýy múmkin. Sondaı-aq buǵan devalvasıalyq kútýlerge, kedendik baqylaý nemese salyqtyq jeńildikterge baılanysty áser túrtki bolýy yqtımal", - deıdi sarapshylar.
Buǵan deıin saıtymyzda "Qazaqstannyń iri salyq boryshkerleri anyqtaldy: 10 kompanıa 448 mlrd teńge qaryz" degen maqala jarıalanǵan bolatyn.
