Bas prokýratýra Qazaqstannyń fýtbol federasıasy men fýtbol klýbtarynda tekserý júrgizip, birqatar buzýshylyqtardy anyqtady. Onyń ishinde kelisilgen machtar men býkmekerlik keńselerdegi bás tigý faktileri de áshkere bolǵan. Bul masqara jaıttar Abzal Quspannyń depýtattyq saýalyna Bas prokýror Berik Asylovtyń bergen jaýabynda aıtylady, dep habarlaıdy Dalanews.kz.
"Eńbek sharttarymen tyıym salynǵanyna qaramastan, fýtbolshylar men bapkerler býkmekerlik keńse qyzmetin tutynyp, bás tigip júre bergen. Máselen, Aqtóbe qalasynda 9 fýtbolshy jalpy somasy 110 mln teńgege bás tikken. Osyǵan baılanysty, 2025 jylǵy 2 sáýirde atalǵan federasıaǵa zańbuzýshylyqtyń kózin joıý týraly usyný engizildi. Federasıa tarapynan anyqtalǵan buzýshylyqtardy joıý jáne qarjylyq ornyqtylyqty qamtamasyz etý maqsatynda "Jol kartasy" ázirlendi. Onda aýdıt, qarjy jáne ádep jónindegi komıtetterdi qurý, sondaı-aq qarjylyq tártipti kúsheıtýge baǵyttalǵan 33 is-sharany iske asyrý kózdelgen", delingen resmı jaýapta.
Federasıanyń málimetine sáıkes, tekserý qorytyndysy boıynsha birqatar kadrlyq sheshimder qabyldandy:
- 2025 jyldyń 20 mamyrdaǵy jaǵdaı boıynsha federasıa ákimshiliginiń basshysymen, basqarýshy dırektormen, zań, operasıalyq jáne marketıń departamentteriniń dırektorlarymen, qaýipsizdik jáne ıntegrıtı qyzmetiniń basshysymen aradaǵy eńbek sharttary buzyldy.
- sondaı-aq, federasıanyń birqatar basshy qyzmetkerleri laýazymdarynan tómendetildi.
"Qazirgi ýaqytta federasıa zańdylyqty buzýshylyqtardy joıý, qarjylyq tártipti kúsheıtý jáne fýtboldy damytýdyń jańa maqsattary men mindetterine saı uıymdyq qurylymyn ońtaılandyrý boıynsha jumysty jetildirýde", dep naqtylanady.
Buǵan deıin taǵy bir depýtattyń sport salasyna qatysty kótergen máseleni jazǵan bolatynbyz. Máselen, 2016 jyly Astana ákimdigi "Tulpar" at sporty keshenin aýksıon arqyly nebári 200 myń teńgege satyp jibergen, keıin qala bıligi jańa "Arǵymaq" at sporty keshenin búdjetten 7 mlrd teńgege qaıta satyp alýǵa sheshim qabyldaǵan.
