Sońǵy kezderi halyq tarapynan qazaqstandyq fýtbol klýbtarynyń jeidesine basylǵan býkmekerlik kompaniialardyń logotipterine qatysty syn aityla bastady. Olardyń klýbtardyń basty demeýshisi retinde logotipterin ornalastyrýǵa qaqy bar ekeni túsinikti. Al álemdik tájiribe ne deidi? Osyǵan orai Dalanews.kz zertteý júrgizgen bolatyn.
Keiingi jyldary álemdik fýtbolda oiynshylar ǵana emes, býkmekerlik kompaniialardyń logotipteri de jarysyp bastaǵan. Investigate Europe zertteý jobasynyń deregi boiynsha, býkmekerlik kompaniialar 2024-2025 jyldary Eýropalyq odaq pen Ulybritaniiadaǵy 31 joǵarǵy ligada óner kórsetetin 442 klýbtyń teń jartysyna seriktes bolǵan. Iaǵni qarjylyq qoldap, demeýshilik etken. Árbir úshinshi klýb oiyn formasynyń aldyna býkmekerlik keńseniń logotipin ornalastyrǵan. Al fýtboldaǵy árbir ekinshi liga titýldyq demeýshi retinde dál osy sala ókilderine táýeldi.
Qazir býkmekerler men fýtboldyń álemdik epitsentri retinde aǵylshyn Premer-ligasy kóbirek tanylýda. APL býkmekerler úshin basty naryq. Biylǵy maýsymda 20 fýtbol klýbynyń 9-ynyń basty seriktesi býkmekerler bolyp otyr. «Aston Villa» — Betano, «Bornmýt» — BJ88, «Brentford» — Hollywood Bets, «Everton» — Stake, «Fýlhem» — SBOTOP, «Lester» — BC.Game, «Kristal Pelas» — NET88, «Saýtgempton» — Rollbit, «Vest Hem» — Betway. Al keler jyldan bastap, býkmekerler ózara kelisip, fýtbol jeidelerinen logotipterin alyp tastaýǵa erikti sheshim qabyldaýy múmkin. Biraq talqylaýlar áli de júrip jatyr.
Italiiada býkmekerlik biznestiń jarnamasyna 2019 jyldan beri tyiym salynǵan. Biraq A seriiasynyń 20 komandasynyń barlyǵy derlik keminde bir býkmekerlik keńsemen seriktes retinde kelisim-shartqa otyrǵan. Germaniiada bul úles - 78%, Frantsiiada - 72%. Fýtboldy spektakl desek te, qazir bul úlken biznes. Iri býkmekerler ózderimen seriktes klýbtarǵa jylyna 15 million eýro shamasynda qarjylyq kómek kórsetedi. Al «Liverpýl» men Ladbrokes arasyndaǵy 300 million eýro somasyndaǵy kelisim fýtbol tarihyndaǵy eń qymbat seriktestik dep tanylyp otyr. Býkmekerlik naryqtyń basty aktivi - aýditoriia. «Real Madrid» Aziiada KOK Sports-pen, al Latyn Amerikasynda Codere-men jumys isteidi. Osylaisha, ár naryqqa beiimdelgen jeke demeýshilik jelisi qalyptasqan.
Búgingi fýtboldyń kórinbeitin basty investory býkmeker ekeni ras. Qazir Qazaqstandaǵy fýtbol klýbtarynyń da taǵdyry býkmekerlik keńseler syndy seriktesterdiń qolynda ekenin eshkim jasyra almaidy. Qazaqstan da bul álemdik sport trendiniń ishinde keledi. Endi fýtbol ligalary úshin qarjy men moral arasyndaǵy tepe-teńdik tabý jaýapkershiligi tur. Býkmekerler de ózara kelisip, kóp jaǵdaida logotipterin fýtbolkanyń aldy jaǵynan artqy jaǵyna aýystyrýǵa, balalarǵa arnalǵan fýtbolkalardan logotipterdi alyp tastaý siiaqty sheshimderge kelýi múmkin.
