سوڭعى كەزدەرى حالىق تاراپىنان قازاقستاندىق فۋتبول كلۋبتارىنىڭ جەيدەسىنە باسىلعان بۋكمەكەرلىك كومپانيالاردىڭ لوگوتيپتەرىنە قاتىستى سىن ايتىلا باستادى. ولاردىڭ كلۋبتاردىڭ باستى دەمەۋشىسى رەتىندە لوگوتيپتەرىن ورنالاستىرۋعا قاقى بار ەكەنى تۇسىنىكتى. ال الەمدىك تاجىريبە نە دەيدى؟ وسىعان وراي Dalanews.kz زەرتتەۋ جۇرگىزگەن بولاتىن.
كەيىنگى جىلدارى الەمدىك فۋتبولدا ويىنشىلار عانا ەمەس، بۋكمەكەرلىك كومپانيالاردىڭ لوگوتيپتەرى دە جارىسىپ باستاعان. Investigate Europe زەرتتەۋ جوباسىنىڭ دەرەگى بويىنشا، بۋكمەكەرلىك كومپانيالار 2024-2025 جىلدارى ەۋروپالىق وداق پەن ۇلىبريتانياداعى 31 جوعارعى ليگادا ونەر كورسەتەتىن 442 كلۋبتىڭ تەڭ جارتىسىنا سەرىكتەس بولعان. ياعني قارجىلىق قولداپ، دەمەۋشىلىك ەتكەن. ءاربىر ءۇشىنشى كلۋب ويىن فورماسىنىڭ الدىنا بۋكمەكەرلىك كەڭسەنىڭ لوگوتيپىن ورنالاستىرعان. ال فۋتبولداعى ءاربىر ەكىنشى ليگا تيتۋلدىق دەمەۋشى رەتىندە ءدال وسى سالا وكىلدەرىنە تاۋەلدى.
ءقازىر بۋكمەكەرلەر مەن فۋتبولدىڭ الەمدىك ەپيسەنترى رەتىندە اعىلشىن پرەمەر-ليگاسى كوبىرەك تانىلۋدا. اپل بۋكمەكەرلەر ءۇشىن باستى نارىق. بيىلعى ماۋسىمدا 20 فۋتبول كلۋبىنىڭ 9-ىنىڭ باستى سەرىكتەسى بۋكمەكەرلەر بولىپ وتىر. «استون ۆيللا» — Betano، «بورنمۋت» — BJ88، «برەنتفورد» — Hollywood Bets، «ەۆەرتون» — Stake، «فۋلحەم» — SBOTOP، «لەستەر» — BC.Game، «كريستال پەلاس» — NET88، «ساۋتگەمپتون» — Rollbit، «ۆەست حەم» — Betway. ال كەلەر جىلدان باستاپ، بۋكمەكەرلەر ءوزارا كەلىسىپ، فۋتبول جەيدەلەرىنەن لوگوتيپتەرىن الىپ تاستاۋعا ەرىكتى شەشىم قابىلداۋى مۇمكىن. ءبىراق تالقىلاۋلار ءالى دە ءجۇرىپ جاتىر.
يتاليادا بۋكمەكەرلىك بيزنەستىڭ جارناماسىنا 2019 جىلدان بەرى تىيىم سالىنعان. ءبىراق ا سەرياسىنىڭ 20 كومانداسىنىڭ بارلىعى دەرلىك كەمىندە ءبىر بۋكمەكەرلىك كەڭسەمەن سەرىكتەس رەتىندە كەلىسىم-شارتقا وتىرعان. گەرمانيادا بۇل ۇلەس - 78%، فرانسيادا - 72%. فۋتبولدى سپەكتاكل دەسەك تە، ءقازىر بۇل ۇلكەن بيزنەس. ءىرى بۋكمەكەرلەر وزدەرىمەن سەرىكتەس كلۋبتارعا جىلىنا 15 ميلليون ەۋرو شاماسىندا قارجىلىق كومەك كورسەتەدى. ال «ليۆەرپۋل» مەن Ladbrokes اراسىنداعى 300 ميلليون ەۋرو سوماسىنداعى كەلىسىم فۋتبول تاريحىنداعى ەڭ قىمبات سەرىكتەستىك دەپ تانىلىپ وتىر. بۋكمەكەرلىك نارىقتىڭ باستى اكتيۆى - اۋديتوريا. «رەال مادريد» ازيادا KOK Sports-پەن، ال لاتىن امەريكاسىندا Codere-مەن جۇمىس ىستەيدى. وسىلايشا، ءار نارىققا بەيىمدەلگەن جەكە دەمەۋشىلىك جەلىسى قالىپتاسقان.
بۇگىنگى فۋتبولدىڭ كورىنبەيتىن باستى ينۆەستورى بۋكمەكەر ەكەنى راس. ءقازىر قازاقستانداعى فۋتبول كلۋبتارىنىڭ دا تاعدىرى بۋكمەكەرلىك كەڭسەلەر سىندى سەرىكتەستەردىڭ قولىندا ەكەنىن ەشكىم جاسىرا المايدى. قازاقستان دا بۇل الەمدىك سپورت ترەندىنىڭ ىشىندە كەلەدى. ەندى فۋتبول ليگالارى ءۇشىن قارجى مەن مورال اراسىنداعى تەپە-تەڭدىك تابۋ جاۋاپكەرشىلىگى تۇر. بۋكمەكەرلەر دە ءوزارا كەلىسىپ، كوپ جاعدايدا لوگوتيپتەرىن فۋتبولكانىڭ الدى جاعىنان ارتقى جاعىنا اۋىستىرۋعا، بالالارعا ارنالعان فۋتبولكالاردان لوگوتيپتەردى الىپ تاستاۋ سياقتى شەشىمدەرگە كەلۋى مۇمكىن.
