Almaty oblysy Shelek aýylynyń 1982 jylǵy týmasy, júk kóliginiń júrgizýshisi Nurjan Janaev BAQ pen quzyrly organdardan kómek surady. Ol bes kúnnen beri kedendik qujattarǵa bailanysty Ázerbaijan aýmaǵynan shyǵa almai otyr, dep habarlaidy Dalanews.kz.
Júrgizýshiniń aitýynsha, ol Qytaidan Ázerbaijanǵa birinshi ret kólik tasymaldap barǵan. Bul saparynda ol segiz kólik alyp barǵan, ár eki kólikke bir CMR júkqujaty rásimdelgen. Barlyǵy tórt CMR qujaty bolǵan.
"Men qujattardy tekserýge terezeden berdim. Qaitarǵanan keiin baiqasam, qolymdaǵy qujattar tolyq emes, ishinde bir-bir paraqtan joq. Bir qujatta úsh bettiń bireýi joq, ekinshisinde shot-faktýra jetispeidi. Solai alyp qalǵan siiaqty. Ózim joǵaltsam tolyq qujatty joǵatpaimyn ba, arasynan bir-birden emes", - deidi Janaev.
Ol Ázerbaijannan shyǵýǵa áreket jasaǵan kezde shekara qyzmetkerleri qujattar tolyq emestigin aityp, ony ótkizýden bas tartqan.
"Men Qytaidan qujattardyń kóshirmesin suradym, olar maǵan PDF formatynda jiberdi. Sóitip joq qujattardy toltyrǵan boldym, biraq endi olarda Reseidiń qyzyl móri bolýy kerek deidi. Al ol mórsiz meni shyǵarmai otyr", — dep túsindirdi júrgizýshi.
Ol mór qolyndaǵy qujattyń kóshirmesinde anyq kórinip turǵanyn aitady. Qujatty qabyldap alǵan kezde túpnusqany alyp qalyp, kóshirmesin beredi, sol kóshirmede qyzyl mór bar.
"Alaida ony qabyldamai otyr", deidi ol.
Jaǵdaidy qiyndatyp turǵan jait: shekarada onyń tólqujatyn kepil retinde alyp qoiǵan.
"Al endi mór qoi dep jatyr, al mende qujat ta, tólqujat ta joq bolǵandyqtan, ol jerge (terminalǵa – esk.) kire almai otyrmyn", — deidi ol.
Janaevtyń aitýynsha, ol Qazaqstan elshiligine de júgingen. Konsýl Ásel esimdi qyzmetker kómektesemin dep ýáde bergen, biraq ýáde oryndalmaǵan.
"Ol "qazir, qazir" dedi, biraq biraz ýaqyt ótkenimen, eshqandai áreket jasamady. Meniń kólikte jatqanyma bes kún boldy", — dedi júrgizýshi.
Ol osy máselege "BAQ nazar aýdarsa eken" deidi, óitkeni Qurban aitqa bailanysty shekara jabylsa, jaǵdaiy múldem qiyndaǵaly turǵanyn aitady.
