"Qazaqstan: orta derjava, qalyptasyp kele jatqan alyp el" ("Kazakhstan: puissance moyenne, géant en devenir"). Frantsiianyń Choiseul geostrategiialyq zertteýler institýtynyń taiaýda jariialaǵan baiandamasy osylai dep atalady, dep habarlaidy Dalanews.kz.
Ǵylymi baiandamanyń avtory atalǵan institýttyń prezidenti Paskal Loro men onyń keńesshisi Per Verlik bolyp tabylady.
QR SIM baspasóz qyzmetiniń habarlaýynsha, baiandama úsh bólimnen turady: saiasi jáne áleýmettik-ekonomikalyq reformalar, eldiń Ortalyq Aziia óńirindegi kóshbasshy retindegi ekonomikalyq damýy, sondai-aq Qazaqstannyń kópvektorly saiasaty men halyqaralyq arenadaǵy bedeli.
Baiandamada Qazaqstannyń Shyǵys pen Batys arasyn bailanystyrýshy býyn retindegi strategiialyq róli, halyqaralyq saiasat pen ekonomikada artyp kele jatqan róli, sondai-aq eldiń jahandyq kún tártibine qosqan belsendi úlesi erekshe atap kórsetilgen.
Choiseul sarapshylary strategiialyq áriptestik sipatqa ie Frantsiianyń Qazaqstanmen aradaǵy yntymaqtastyǵyna erekshe nazar aýdarady. Sondai-aq Qazaqstannyń halyqaralyq yqpalǵa ie "taiaý bolashaqta alyp el bola alatynyn" aitypty.
Choiseul kompaniiasynyń Qazaqstan týraly analitikalyq baiandamasy saiasatkerlerden, kásipkerlerden, zertteýshilerden bastap Qazaqstannyń qazirgi álemdegi róli men geostrategiialyq mańyzyn jaqsy túsinetin oqyrmandardyń keń aýqymyn qamtidy.
Aita ketsek, Choiseul halyqaralyq saiasat jáne geoekonomika institýty – halyqaralyq qatynastar, ekonomikalyq jáne saiasi strategiialar, sondai-aq halyqaralyq mádenietterdi taldaýmen ainalysatyn táýelsiz zertteý ortalyǵy. Olar Frantsiianyń ár salasy nemese sheteldik seriktesterdiń strategiialyq qyzyǵýshylyǵyn týdyratyn analitikalyq esepter jariialap otyrady.
