Frantsiia 1 qyrkúiekten bastap ýltrajyldam sán segmentinde jumys isteitin kompaniialarǵa, sonyń ishinde Shein jáne Temu platformalaryna qarjylyq sanktsiialar qoldana bastady, dep habarlaidy dalanews.kz.
Jańa alym 2026 jylǵy maýsymda Frantsiia parlamenti qabyldaǵan toqyma ónerkásibiniń qorshaǵan ortaǵa áserin azaitý týraly zań aiasynda engizildi. Onyń mólsheri taýardyń túrine qarai belgilenedi: shulyq siiaqty shaǵyn buiymdarǵa 0,25 eýrodan bastap paltoǵa 12 eýroǵa deiin jetedi. Bul rette alym mólsheri salyqsyz taýar baǵasynyń 50 paiyzynan aspaýǵa tiis.
2030 jyldan bastap eń joǵary alym bir taýarǵa 19,50 eýroǵa deiin ulǵaitylady. Frantsiia biligi bul arqyly óndirýshilerdi arzan kiim kólemin qysqartýǵa, ónimniń qyzmet etý merzimin uzartýǵa, sondai-aq kiimdi jóndeý men qaita paidalanýdy yntalandyrýǵa nietti.
Alym kólemin anyqtaý kezinde kiimniń baǵasy men ony jóndeý múmkindigi ǵana emes, kompaniia usynatyn assortimenttiń kólemi de eskeriledi. Iaǵni bir mezette satylymǵa shyǵarylatyn taýar sany neǵurlym kóp bolyp, al tutynýshylardy kiimdi jóndeýge yntalandyrý tómen bolǵan saiyn, kompaniianyń qarjylyq júktemesi de joǵary bolady.
Frantsiia Eýropalyq odaqta onlain-katalogtaǵy taýarlardyń sanyna bailanysty osyndai mehanizm engizip otyrǵan alǵashqy el boldy.
Bul talap ásirese Shein men Temu úshin mańyzdy. Kompaniianyń dereginshe, naýryz aiynyń sońynda Shein platformasynda 2 mln-nan astam taýar pozitsiiasy bolǵan. Kún saiyn platformaǵa shamamen 4,7 myń jańa kiim úlgisi qosylyp otyrǵan. Al Zara jáne H&M siiaqty dástúrli saýda jelilerinde assortiment kólemi áldeqaida az bolǵandyqtan, jańa alymnyń áseri aitarlyqtai bolmaýy múmkin.
Frantsiianyń shaǵyn jáne orta biznes, saýda, qolóner, týrizm jáne satyp alý qabileti máseleleri jónindegi ministri Serj Papen ýltrajyldam sán platformalaryn halyqtyń satyp alý qabiletin shyn máninde qorǵaityn kompaniialar dep sanaýǵa bolmaitynyn aitty.
«Mundai platformalardy satyp alýshylardyń satyp alý qabiletiniń shynaiy qorǵaýshylary dep sanaýǵa bolmaidy, óitkeni tómen baǵalar taýarlardyń tómen sapasy men qysqa merzimde jaramsyz bolýymen qatar júredi», – dedi ministr.
Frantsýz biligi ýltrajyldam sánniń taralýyn toqyma qaldyqtarynyń kóbeiýimen, resýrstardyń shamadan tys tutynylýymen jáne dástúrli saýda sektoryna túsetin qysymnyń kúsheiýimen bailanystyrady.
Jańa alym óndirýshiler men satýshylar keńeitilgen óndirýshi jaýapkershiligi júiesi aiasynda tóleitin ekologiialyq jarnalardyń quramyna engiziledi. Qarajat jinaý jáne jańa talaptarǵa jatatyn kompaniialardy anyqtaý jumystaryn Refashion uiymy júrgizedi.
Qarjylyq sharalarmen qatar Frantsiia ýltrajyldam sán sanatyna jatatyn kompaniialardyń jarnamasyna tyiym salýdy josparlap otyr. Bul shekteý 2027 jylǵy 1 qańtardan bastap kúshine enýi tiis.
Frantsiianyń jańa sharalary Aziiadan keletin asa arzan taýarlarǵa qarsy Eýropada júrgizilip jatqan keń aýqymdy saiasattyń bir bóligine ainaldy. 2026 jylǵy shildeden bastap Eýropalyq odaqta quny 150 eýrodan tómen shaǵyn sálemdemelerge de 3 eýro kóleminde alym engizildi. Bul shara Shein men Temu biznes-modeline tikelei áser etedi.
Qytai Frantsiianyń jańa zańyn synǵa aldy. Qytaidyń Saýda ministrligi qujatty kemsitýshilik sipattaǵy shara dep baǵalap, onyń Dúniejúzilik saýda uiymynyń qaǵidattaryna qaishy kelýi múmkin ekenin málimdedi.
Shein buǵan deiin qosymsha alymdardyń engizilýi tutynýshylar úshin taýar baǵasynyń ósýine ákelýi múmkin ekenin eskertken.
Jańa alymdardyń engizilýi Shein úshin taǵy bir mańyzdy oqiǵamen tuspa-tus keldi. 1 qyrkúiekte kompaniia Gonkong qor birjasynda saýda-sattyqty bastady. Saýda-sattyqtyń alǵashqy saǵattarynda kompaniia aktsiialary shamamen 10 paiyzǵa arzandady. Kompaniianyń naryqtyq quny 2022 jyly tirkelgen shamamen 100 mlrd dollarlyq sharyqtaý sheginen edáýir tómen boldy.
Osylaisha, Frantsiianyń jańa shekteýleri jappai óndiris, tómen baǵa jáne assortimentti turaqty jańartýǵa negizdelgen ýltrajyldam sán modeline qysymnyń kúsheigenin kórsetedi. Parij qosymsha shyǵyndar iri platformalardy kiim óndirý jáne satý tásilin ózgertýge májbúr etedi dep kútedi. Al kompaniialar bul sharalardyń túpki nátijesi tutynýshylar úshin baǵanyń ósýine ákelýi múmkin ekenin eskertýde.
