Qazaqstan munai men gaz ǵana emes, strategiialyq mańyzy joǵary sirek mineraldarymen de álemdik iri oiynshylardyń nazaryn aýdaryp keledi. Bul joly Frantsiia Qazaqstannyń mańyzdy shikizat qorlaryna qyzyǵýshylyq bildirdi, dep habarlaidy dalanews.kz.
Qazaqstan men Frantsiia mańyzdy shikizat materialdary jónindegi birlesken jumys tobynyń alǵashqy otyrysyn ótkizdi.
Kezdesý barysynda taraptar geologiialyq barlaý jumystaryn, geologiialyq derektermen almasýdy, zerthanalyq zertteýlerdi, taý-ken óndirisi salasyn damytýdy jáne jańa birlesken jobalardy talqylady.
Sondai-aq jiynda titan men basqa da strategiialyq mańyzy joǵary resýrstardy jetkizý máselesine erekshe nazar aýdaryldy. Bul shikizat túrleri búginde álemdik ekonomikanyń kóptegen salalary úshin asa qajet bolyp otyr.
Ónerkásip komiteti tóraǵasynyń orynbasary Oljas Álibekovtiń aitýynsha, Qazaqstan Eýropalyq odaqtyń mańyzdy shikizattar tizimine engizilgen 34 materialdyń 21 túrin óndiredi jáne óńdeidi.
Mamandardyń pikirinshe, bul kórsetkish Qazaqstannyń jahandyq shikizat naryǵyndaǵy rólin kúsheitip, halyqaralyq áriptestik úshin jańa múmkindikter ashyp otyr.
