ForteBank qazaq tiline qatysty taǵy bir daýǵa uryndy. Threads-tegi qazaqtildi qaýym banktiń ótken qatelikterden sabaq almaǵanyn eske salyp jatyr, dep habarlaidy Dalanews.kz Ertenmedia-ǵa silteme jasap.
Oqiǵa Batyr Kámel esimdi azamattyń bankke jumysqa ornalasý maqsatymen jazǵan habarlamasynan bastalǵan. Forte-niń ýatsaptaǵy biznes-akkaýnty arqyly bank operatorymen tildesken ol áńgimeni qazaqsha órbitýge niet tanytqan. Alaida bank ókili birden: «Qazaq tilin bilmeimin, orys tiline kóshe alamyz ba» degen saýal qoiǵan.
«Orys tilin jaqsy bilemin, biraq qazaqsha sóilesken yńǵaily» degen Batyr Kámeldiń jaýabyna bank qyzmetkeri: «Ý nas vajno znanie rýsskogo iazyka na prodvinýtom ýrovne» dep shart qoiypty. Ári qaraiǵy áńgime til tóńiregindegi diskýssiiaǵa ulasyp, jumys máselesi ekinshi retke syrǵyǵan.
«Orys tilin bala kúnimnen erkin meńgergenmin. Oqyp-toqyǵan ortam da orystildi boldy. Biraq kúndelikti ómirde qazaqsha sóilesýge tyrysamyn. Bul ma, bul meniń jeke ustanymym» degen avtordyń jaýabynan keiin bank qyzmetkeri ári qaraiǵy dialogty jalǵastyrýdan bas tartqan.
«Sonda Forte qyzmetkerleri memlekettik tildi bilmeidi me?» degen Batyrdyń saýalyna álgi maman: «men adamdarmen ádep pen shekarany saqtai otyryp sóilese bilemin» dep áńgime aýanyn basqa baǵytqa burǵan eken.
Threads-tegi qaýym kúnige ondaǵan, júzdegen adammen tildesetin bank qyzmetkeriniń áreketin qazaq tiline degen qurmetsizdik retinde baǵalaýda. Kópshilik bank basshylyǵynyń ótken qatelikterden sabaq almaǵanyn eske salyp jatyr.
«Qazaqstandaǵy iri qarjy uiymynda mem.tildi bilmeitin mamandar qalai jumys isteidi? Koll ortalyqta ádette eki tildi de jetik meńgergen menedjerler otyrýy tiis emes pe? Bank osy arqyly kúlli qazaqtildi aýditoriianyń ar-namysyna tiip otyr», — deidi jelidegi qaýym.
ForteBank ázirge bul máselege qatysty resmi pikir bildirmedi.
