ForteBank قازاق تىلىنە قاتىستى تاعى ءبىر داۋعا ۇرىندى. Threads-تەگى ءقازاقتىلدى قاۋىم بانكتىڭ وتكەن قاتەلىكتەردەن ساباق الماعانىن ەسكە سالىپ جاتىر، دەپ حابارلايدى Dalanews.kz Ertenmedia-عا سىلتەمە جاساپ.
وقيعا باتىر كامەل ەسىمدى ازاماتتىڭ بانككە جۇمىسقا ورنالاسۋ ماقساتىمەن جازعان حابارلاماسىنان باستالعان. Forteء-نىڭ ۋاتساپتاعى بيزنەس-اككاۋنتى ارقىلى بانك وپەراتورىمەن تىلدەسكەن ول اڭگىمەنى قازاقشا وربىتۋگە نيەت تانىتقان. الايدا بانك وكىلى بىردەن: «قازاق ءتىلىن بىلمەيمىن، ورىس تىلىنە كوشە الامىز با» دەگەن ساۋال قويعان.
«ورىس ءتىلىن جاقسى بىلەمىن، ءبىراق قازاقشا سويلەسكەن ىڭعايلى» دەگەن باتىر كامەلدىڭ جاۋابىنا بانك قىزمەتكەرى: «ۋ ناس ۆاجنو زنانيە رۋسسكوگو يازىكا نا پرودۆينۋتوم ۋروۆنە» دەپ شارت قويىپتى. ءارى قارايعى اڭگىمە ءتىل توڭىرەگىندەگى ديسكۋسسياعا ۇلاسىپ، جۇمىس ماسەلەسى ەكىنشى رەتكە سىرعىعان.
«ورىس ءتىلىن بالا كۇنىمنەن ەركىن مەڭگەرگەنمىن. وقىپ-توقىعان ورتام دا ءورىستىلدى بولدى. ءبىراق كۇندەلىكتى ومىردە قازاقشا سويلەسۋگە تىرىسامىن. بۇل ما، بۇل مەنىڭ جەكە ۇستانىمىم» دەگەن اۆتوردىڭ جاۋابىنان كەيىن بانك قىزمەتكەرى ءارى قارايعى ديالوگتى جالعاستىرۋدان باس تارتقان.
«سوندا Forte قىزمەتكەرلەرى مەملەكەتتىك ءتىلدى بىلمەيدى مە؟» دەگەن باتىردىڭ ساۋالىنا الگى مامان: «مەن ادامدارمەن ادەپ پەن شەكارانى ساقتاي وتىرىپ سويلەسە بىلەمىن» دەپ اڭگىمە اۋانىن باسقا باعىتقا بۇرعان ەكەن.
Threads-تەگى قاۋىم كۇنىگە ونداعان، جۇزدەگەن اداممەن تىلدەسەتىن بانك قىزمەتكەرىنىڭ ارەكەتىن قازاق تىلىنە دەگەن قۇرمەتسىزدىك رەتىندە باعالاۋدا. كوپشىلىك بانك باسشىلىعىنىڭ وتكەن قاتەلىكتەردەن ساباق الماعانىن ەسكە سالىپ جاتىر.
«قازاقستانداعى ءىرى قارجى ۇيىمىندا مەم.ءتىلدى بىلمەيتىن ماماندار قالاي جۇمىس ىستەيدى؟ كولل ورتالىقتا ادەتتە ەكى ءتىلدى دە جەتىك مەڭگەرگەن مەنەدجەرلەر وتىرۋى ءتيىس ەمەس پە؟ بانك وسى ارقىلى كۇللى ءقازاقتىلدى اۋديتوريانىڭ ار-نامىسىنا ءتيىپ وتىر»، — دەيدى جەلىدەگى قاۋىم.
ForteBank ازىرگە بۇل ماسەلەگە قاتىستى رەسمي پىكىر بىلدىرمەدى.
