Forbes Woman Kazakhstan alǵash ret eldegi eń bai 25 áieldiń reitingin jariialady. Tizimge engenderdiń jiyntyq bailyǵy shamamen 8 mlrd dollardan asady, dep habarlaidy Dalanews.kz.
Forbes.kz usynǵan málimetke sáikes, reiting kóshin 5,4 mlrd dollar bailyǵymen Dinara Qulybaeva bastaidy. Ol Halyk Bank-tiń iri aktsioneri jáne Altynalmas altyn óndirý kompaniiasymen bailanysty.
Ekinshi orynda shamamen 640 mln dollar kapitaly bar Mýkadashan Ibragimova tur. Onyń negizgi aktivi – Eurasian Resources Group (ERG) quramyndaǵy úles. Úshinshi oryndy 550 mln dollarmen Dariǵa Nazarbaeva ielengen. Onyń aktivteri media salasyna tiesili. Atap aitqanda, Khabar agenttigi jáne birqatar teleradio jobalarǵa basshylyq etedi.
Tórtinshi orynda 250 mln dollar shamasynda bailyǵy bar Anjela Sársenova. Ol janarmai naryǵy men bólshek saýda sektorynda jumys isteidi. Bestikti 200 mln dollardan astam kapitaly bar Aijan Esim túiindeidi, onyń aktivteri ónerkásip jáne azyq-túlik óndirisimen bailanysty.
Altynshy orynǵa Aidan Súleimenova jaiǵasqan. Ol saqtandyrý jáne qarjy sektoryndaǵy iri kompaniialarmen bailanysty, bailyǵy júzdegen million dollarmen baǵalanady. Jetinshi bolyp investitsiialyq jobalarymen tanylǵan Raýshan Saǵdieva tur.
Segizinshi orynnan bastap reitingte ártúrli saladaǵy kásipker áielder bar. Olardyń qatarynda development, qurylys, farmatsevtika, bilim berý, saýda jáne qyzmet kórsetý sektorlarynda jumys isteitin biznes ókilderi kezdesedi. Atap aitqanda, tizimge qurylys jáne jyljymaityn múlik naryǵynda jumys isteitin kásipkerler, iri saýda jelileriniń ieleri, farmatsevtikalyq kompaniialarmen bailanysty tulǵalar, sondai-aq qarjy jáne investitsiia salasyndaǵy áielder engen.
Reitingtiń orta bóliginde bailyǵy shamamen 50–150 mln dollar aralyǵyndaǵy kásipkerler ornalasqan. Olardyń basym bóligi – iri kompaniialardyń aktsionerleri nemese seriktesteri. Sonymen qatar bul topta óz biznesin damytyp kele jatqan kásipker áielder de bar.
Tizimniń sońǵy bóliginde bailyǵy ondaǵan million dollarmen baǵalanatyn qatysýshylar ornalasqan. Olar negizinen shaǵyn jáne orta biznes, qyzmet kórsetý, saýda, bilim berý jáne IT baǵyttarynda jumys isteidi.
Forbes sarapshylarynyń málimetinshe, reitingke engen áielderdiń bailyǵynyń 85–90 paiyzy otbasylyq nemese seriktestik aktivtermen bailanysty. Bul Qazaqstandaǵy iri kapitaldyń kóbine otbasylyq biznes qurylymdary arqyly shoǵyrlanǵanyn kórsetedi.
Sonymen qatar reiting kapitaldyń joǵary deńgeide shoǵyrlanǵanyn aiqyndady. Jalpy bailyqtyń basym bóligi alǵashqy bestikke tiesili, al Dinara Qulybaevanyń úlesi erekshe basym.
