Qorǵaljyn dalasynda qoqiqazdardyń qyzǵylt beinesi kózge birden túsedi. Tabiǵattyń osy kórinisi sońǵy jyldary aýdannyń týristik brendine ainalyp keledi, dep habarlaidy dalanews.kz.
Al biyl bul jerge qoqiqazdy tamashalaýǵa týristermen birge sheteldik diplomattar da jinaldy. 5 qyrkúiekte Qorǵaljynda ekinshi ret Flamingo Fest ótti.
Dala News tilshisi festivalge baryp, biylǵy sharanyń qalai ótkenin jáne bir jyl ishinde ne ózgergenin kórdi.
Festivalge Qazaqstannyń ár óńirinen kelgen qonaqtarmen qatar, 30-dan astam sheteldik elshiliktiń ókilderi qatysty. Baǵdarlamada qolóner jármeńkesi, «Flamingo Art» kórmesi, ulttyq oiyndar, mýzykalyq qoiylymdar jáne Qorǵaljyn qoryǵy aýmaǵyndaǵy qoqiqazdardyń mekenine ekskýrsiialar boldy.
Sheteldik qonaqtardyń bir bóligi úshin bul Qorǵaljynǵa alǵashqy sapar. Olardyń qatarynda Livannyń Qazaqstandaǵy elshisi Djordj Abý Zeid te bar. Ol festivalge otbasymen kelgen. Tilshimen áńgimesinde diplomat Qorǵaljynnyń tabiǵatyna erekshe nazar aýdarǵanyn aitty. Baǵdarlama tyǵyz bolǵandyqtan, barlyq nysandy tolyq aralap shyǵýǵa múmkindik bolmaǵanymen, aimaqtyń tabiǵaty men qoqiqazdardyń ózi jaqsy áser qaldyrǵan.
Festivaldiń negizgi maqsatynyń biri de osy tabiǵi áleýetti týrizmge ainaldyrý. Qorǵaljyn aýdanynda jylyna shamamen 2 myń týrist qabyldanady. Aýdan ákimi Almas Alinniń aitýynsha, kelýshiler sanyn eki-úsh esege arttyrý óńir ekonomikasyna da áser etýi múmkin.
Alaida týristik aǵyndy arttyrý úshin bir kúndik festivaldiń ózi jetkilikti me degen suraq týyndaidy.
Biylǵy Flamingo Fest ótken jylmen salystyrǵanda uiymdastyrý jaǵynan aýqymdyraq kóringenimen, baǵdarlamanyń bir kúnge tyǵyz ornalasqany baiqaldy. Keibir sharalar jyldam ótip, jýrnalister men qonaqtarǵa aqparat alý jáne baǵdarlamaǵa tolyq ilesý úshin ýaqyt az boldy. Iaǵni festivaldiń syrtqy kórinisi men mazmuny bar bolǵanymen, ony júieli týristik ónimge ainaldyrý máselesi áli de ózekti.
Muny biýdjetten de kórýge bolady.
Memlekettik satyp alý portalyndaǵy málimetke sáikes, 2025 jyly Flamingo Fest-ti uiymdastyrý boiynsha kelisimshart somasy 1,433 mln teńgeni quraǵan. Al 2026 jyly dál osy baǵyttaǵy kelisimshart 3,12 mln teńgege jasalǵan. Satyp alýdyń josparlanǵan somasy 3,5 mln teńge bolǵan. Qujatta qarjylandyrýdyń biýdjet qarajaty esebinen júzege asyrylatyny kórsetilgen.
Osylaisha, bir jyl ishinde festivaldi uiymdastyrýǵa arnalǵan kelisimshart somasy shamamen 1,69 mln teńgege nemese 118%-ǵa ósken. Bul rette 3,12 mln teńge festivaldiń barlyq shyǵyny emes, memlekettik satyp alý arqyly uiymdastyrý qyzmetterine jasalǵan kelisimsharttyń somasy ekenin atap ótken jón.
Birinshi Flamingo Fest 2025 jyly ótken. Ol kezde baǵdarlamada kontsertter men shyǵarmashylyq baiqaýlardan bastap, ulttyq oiyndar men qolóner jármeńkesine deiingi birqatar shara qamtyldy. Biyl uiymdastyrýshylar tabiǵi týrizm men diplomatiialyq qonaqtarǵa kóbirek nazar aýdarǵan.
Qorǵaljyn úshin qoqiqaz tek ádemi sýretke túsetin nysan emes. Bul óńirdiń týristik áleýetin qalyptastyratyn tabiǵi resýrs. Biraq týrister sanyn 2 myńnan 4-6 myńǵa jetkizý maqsaty qoiylsa, festivaldi jylyna bir ret ótkizýmen shektelý jetkiliksiz.
Qonaq keletin jol, qonatyn jer, tamaqtanatyn oryn, turaqty ekskýrsiia, kásibi gid, kólik jáne eń bastysy, tabiǵatty qorǵaý talaptary qatar damýy kerek. Sonda Flamingo Fest bir kúndik merekeden Qorǵaljynǵa jyl boiy týrist ákeletin naqty quralǵa ainalýy múmkin.
