Qazaqstandaǵy bank konglamerattary jedel irilenýde. Halyk – Altyn bank, Kaspi – Alatau City alianstarynyń qataryna jaqynda Forte – Home Credit grýppirovkasy qosyldy. Endi Timýr Týrlovtyń Freedom júiesi men Baqtiiar Báiseiitovtyń TsentrKredit toby da osy báigeden qalǵysy kelmeidi. Olarǵa aktivterin kádimgidei arttyra alatyn bir ǵana qarjy institýty bar. Ol – "Eýraziialyq bank", dep habarlaidy Dalanews.kz.
"Qosymsha bank satyp alyp úlgermegen eki oligarh Eýraziia tobyn jaǵalap júr. Kelissózderdegi basty problema – Eýraziialyq banktiń úsh teń aktsioneri arasynda ózara bitim joq. Shodiev pen Mashkevich tarapy bankti jaqsy somaǵa satyp, sektordan ketkisi keledi. Al oǵan úshinshi aktsioner Shýhrat Ibragimov kelispei otyr", - deidi, DALA INSIDE derekkózi.
Shýhrat Ibragimov Eýraziialyq bankti múlde satqysy kelmei me, álde oǵan usynylǵan baǵa unamai otyr ma? Jáne bul banktiń ádil baǵasy qansha?
2024 jyldyń qorytyndysy boiynsha bank kapitaly 399 milliard teńgege jeter-jetpes bolyp turdy. Aktivteri 3,1 trillion teńgeden asty. Mindettemeleri 2,7 trillion teńgeni qurady. Jylyna orta eseppen bank 80 milliard teńge taza kiris alady. Memleketke 150 milliard teńge qaryzy bar. Sonda gýdvilyn qosa alǵanda Eýraziialyq bank kem degende 1 milliard dollar turýy tiis. Biraq ony úsh aktsionerge bólsek, árqaisysyna 300 million dollardan astam soma shyǵyp tur.
"Oligarhtar 2 milliard dollar usynsa Eýraziialyq bankti kelistirýge bolatyn syńaily. Biraq oǵan Týrlov pen Báiseiitovtyń basy bos aqshasy joq. Mysaly, Forte toby Home Credit bankin shamamen 1 milliard dollarǵa satyp aldy. Ol kezde Home Credit menshikti kapitaly 200 milliard teige bolyp turǵan. Sondyqtan kóp degende Eýraziialyq bank aktsionerlerine 800 milliard teńge usynylýy múmkin", - deidi, derekkóz.
Eger Eýraziialyq bank satylmai qoisa, onda rezervti tizimde Nurbank bar. Óz biznes-modelin naqtylai almaǵan bul qarjy institýtyna naryqtyń qolaily shaǵynda satylý jaman sheshim emes. Sondyqtan biyl Qazaqstannyń qarjy sektorynda taǵy da bir banktyń satylýyn kóretinimiz anyq.
