قازاقستانداعى بانك كونگلامەراتتارى جەدەل ىرىلەنۋدە. Halyk – Altyn bank، Kaspi – Alatau City اليانستارىنىڭ قاتارىنا جاقىندا Forte – Home Credit گرۋپپيروۆكاسى قوسىلدى. ەندى تيمۋر تۋرلوۆتىڭ Freedom جۇيەسى مەن باقتيار بايسەيىتوۆتىڭ سەنتركرەديت توبى دا وسى بايگەدەن قالعىسى كەلمەيدى. ولارعا اكتيۆتەرىن كادىمگىدەي ارتتىرا الاتىن ءبىر عانا قارجى ينستيتۋتى بار. ول – "ەۋرازيالىق بانك"، دەپ حابارلايدى Dalanews.kz.

"قوسىمشا بانك ساتىپ الىپ ۇلگەرمەگەن ەكى وليگارح ەۋرازيا توبىن جاعالاپ ءجۇر. كەلىسسوزدەردەگى باستى پروبلەما – ەۋرازيالىق بانكتىڭ ءۇش تەڭ اكسيونەرى اراسىندا ءوزارا ءبىتىم جوق. شودييەۆ پەن ماشكيەۆيچ تاراپى بانكتى جاقسى سوماعا ساتىپ، سەكتوردان كەتكىسى كەلەدى. ال وعان ءۇشىنشى اكسيونەر شۋحرات يبراگيموۆ كەلىسپەي وتىر"، - دەيدى، DALA INSIDE دەرەككوزى.

شۋحرات يبراگيموۆ ەۋرازيالىق بانكتى مۇلدە ساتقىسى كەلمەي مە، الدە وعان ۇسىنىلعان باعا ۇناماي وتىر ما؟ جانە بۇل بانكتىڭ ءادىل باعاسى قانشا؟

2024 جىلدىڭ قورىتىندىسى بويىنشا بانك كاپيتالى 399 ميلليارد تەڭگەگە جەتەر-جەتپەس بولىپ تۇردى. اكتيۆتەرى 3،1 تريلليون تەڭگەدەن استى. مىندەتتەمەلەرى 2،7 تريلليون تەڭگەنى قۇرادى. جىلىنا ورتا ەسەپپەن بانك 80 ميلليارد تەڭگە تازا كىرىس الادى. مەملەكەتكە 150 ميلليارد تەڭگە قارىزى بار. سوندا گۋدۆيلىن قوسا العاندا ەۋرازيالىق بانك كەم دەگەندە 1 ميلليارد دوللار تۇرۋى ءتيىس. ءبىراق ونى ءۇش اكسيونەرگە بولسەك، ءارقايسىسىنا 300 ميلليون دوللاردان استام سوما شىعىپ تۇر.

"وليگارحتار 2 ميلليارد دوللار ۇسىنسا ەۋرازيالىق بانكتى كەلىستىرۋگە بولاتىن سىڭايلى. ءبىراق وعان تۋرلوۆ پەن بايسەيىتوۆتىڭ باسى بوس اقشاسى جوق. مىسالى، Forte توبى Home Credit بانكىن شامامەن 1 ميلليارد دوللارعا ساتىپ الدى. ول كەزدە Home Credit مەنشىكتى كاپيتالى 200 ميلليارد تەىگە بولىپ تۇرعان. سوندىقتان كوپ دەگەندە ەۋرازيالىق بانك اكسيونەرلەرىنە 800 ميلليارد تەڭگە ۇسىنىلۋى مۇمكىن"، - دەيدى، دەرەككوز.

ەگەر ەۋرازيالىق بانك ساتىلماي قويسا، وندا رەزەرۆتى تىزىمدە نۇربانك بار. ءوز بيزنەس-مودەلىن ناقتىلاي الماعان بۇل قارجى ينستيتۋتىنا نارىقتىڭ قولايلى شاعىندا ساتىلۋ جامان شەشىم ەمەس. سوندىقتان بيىل قازاقستاننىڭ قارجى سەكتورىندا تاعى دا ءبىر بانكتىڭ ساتىلۋىن كورەتىنىمىز انىق.