Jiyrma jyldan keiin Qytai Qazaqstannan et importtaýǵa salǵan tyiymyn alyp tastady. Qus ónimderine bul tyiym 2005 jyly engizildi, al aýsylǵa shekteýler 2022 jyly belgilendi. 2023 jyldyń qarashasynda eki eldiń ókilderi arasynda kelissózder ótip, nátijesinde saýda kedergilerin joiý týraly kelisimge qol jetkizildi.
Almaty oblysynyń kásipkeri, «Meat Processing and Service» JShS bas direktory Abdrasilov Baqytjan shekteýler joiylǵannan keiin et ónimderiniń birinshi partiiasyn, Qytai Halyq Respýblikasynyń veterinarlyq-sanitarlyq talaptaryna sai keletin 20 tonna siyr etin sátti eksporttady.
Bul kásiporyn 2009 jyldan beri jumys isteidi jáne «Qazaqstan et odaǵy» respýblikalyq qaýymdastyǵynyń múshesi bolyp tabylady. Ol iri jáne usaq maldyń etin óńdeýge jáne konservileýge, sondai-aq maldy bordaqylaýǵa jáne soiýǵa mamandanǵan. Kásiporynnyń mal basy 1,2 myńnan asady, al bordaqylaý bazasy bir mezette 3 myń basqa deiin maldy qabyldai alady. Kásiporynnyń óndiristik qýaty 10 saǵatta 200 basqa deiin iri qara maldy jáne 1000 basqa deiin usaq maldy óńdeýge múmkindik beredi. Sonymen qatar, Iran, Saýdiia, Katar, BAÁ, Oman jáne Bahrein elderimen kóterme et saýdasy jolǵa qoiylǵan.
Oblys ákiminiń orynbasary Almas Batanov pen aýyl sharýashylyǵy basqarmasynyń basshysy Qýandyq Chýnkýnov kásiporyndy aralap, onyń eksporttyq áleýetin joǵary baǵalap, bul qadamnyń óńirdiń agroónerkásiptik keshenin damytý jáne Qazaqstannyń álemdik naryqtaǵy ornyn nyǵaitýdaǵy mańyzdylyǵyn atap ótti.
«Bul jetistik – sapaly et ónimderimen el ekonomikasyna súbeli úles qosyp kele jatqan Almaty oblysy sharýalarynyń eńbeginiń jemisi», – dedi oblys ákiminiń orynbasary Almas Batanov. «Biz agroónerkásiptik keshenniń odan ári damýyna jáne Qazaqstannyń halyqaralyq ustanymynyń nyǵaiýyna septigin tigizetin, aimaqtyń eksporttyq múmkindikteri odan ári arta túsetinine senimdimiz».
Et ónimderiniń birinshi partiiasyn Qytaiǵa eksporttaý – Almaty oblysynyń agroónerkásip kesheni úshin eleýli jetistik. Bul qadam qazaqstandyq ónimniń joǵary sapasyn rastap qana qoimai, aýyl sharýashylyǵyndaǵy halyqaralyq yntymaqtastyqty damytýdyń jańa perspektivalaryn ashady. Biz óńir kásipkerleriniń tabystaryn maqtan tutamyz jáne elimizdiń ekonomikasyn nyǵaita túsetin eksporttyq múmkindikterdiń odan ári ósetinine senimdimiz.
