Májilis depýtaty Baqytjan Bazarbek "Qasqa jol" YouTube-arnasyna bergen suhbatynda Qazaqstannyń milliondaǵan gektar ulan baitaq jeri jeke adamdarǵa zańsyz ótip ketkenin aitty, - dep habarlaidy Dalanews.kz.
Depýtattyń sózinshe, bir memleketterdiń 30 paiyz kólemin alatyn jer Qazaqstanda tek bir kompaniianyń qolynda.
"10 million jer memlekettik menshikke qaitaryldy. 10 million bostan-bos jer emes. Qaraǵandy oblysynda 1 million gektar jer bir JShS-nyń qolynda. Kóbi "qarapaiymnan jerdi alasyzdar da, úlken dókeilerden almaisyzdar" deidi. Bul jumys endi bastaldy. Búkil ákimdiktiń baqylaý fýnktsiialaryn jer resýrsyn basqarý komitetine endi ǵana qaitardy. Oǵan aryz jazdyq. Sóitip, jeńiske jetip, tolyq ókilettilikti berdik", - deidi Bazarbek.
2022 jyly qyrkúiekten bastap Qazaqstanda jer salasyna qatysty moratorii alynyp tastalǵan. Depýtat osy kezde 5 myń sýbektige tekseris ashylǵanyn jetkizdi. Al byltyr 10 million jer qaitarylǵan.
"Onymen shektelmeimiz. Qansha jer zańsyz ketip qalǵanyn bilmeimiz. 30 jylda berilgen jerler. Jer kodeksi normalaryna qaramai, aǵasy, kókesi, Jákesi, inisi, baýyry, anaý oligarhtyń, myna prokýrordyń, anaý ákimniń týǵan-týystaryna, tamyrlaryna bere bergen. Endi ádildikti qalpyna keltirip jatyrmyz. Áp sátte bárin alyp qoiý múmkin emes.
Eski Qazaqstannyń ókilderi barlyq jerde otyr, aiyrylǵysy kelmeidi. Oligarhtyń artynda sol aýdannyń prokýrory otyr. Ol "iá, iá, oligarhtardan jerdi alamyz" deidi. Efir bitkennen keiin oligarhty shaqyryp alyp, "seniń jerińdi teksereiin dep jatyr, myna jerdi ananyń atyna rásimdep jiber, men saǵan joldaryn kórsetip otyramyn" deidi.
Bilikte qazir Eski Qazaqstannyń ókilderi bar. Olar prokýratýrada otyr, oblystyq ákimdikte otyr, ministrlikte otyr. Sondyqtan Eski Qazaqstannyń ókilderinen tazartýymyz kerek", - dedi depýtat.
