Qosshy qalasy ákiminiń orynbasary prokýrordyń eskertýin oryndamaǵany úshin ákimshilik jaýapqa tartyldy, dep habarlaidy Dalanews.kz.
Buǵan deiin qalalyq Aqmola oblysynyń prokýratýrasy biýdjettik zańnamanyń buzylǵany týraly eskertý jasap, barlyq kemshilikti joiýdy talap etken. Alaida ákimdik resmi hatqa jaýap bermegen. Prokýrorlar aitqan másele qai jerde jáne qashan qaralatynyn da habarlamaǵan. Osydan keiin Ákimshilik kodekstiń eki baby boiynsha is qozǵaldy. Al biýdjetke jaýapty qala ákiminiń orynbasaryna 370 000 teńgeden astam somaǵa aiyppul salyndy.
"Prokýratýra týraly" konstitýtsiialyq zańnyń talaptaryna sáikes, memlekettik organdar, uiymdar men laýazymdy adamdar prokýrorlyq qadaǵalaý aktilerin qaraýǵa jáne oryndaýǵa mindetti.
Ákimshilik kodekste osy zań buzýshylyqqa qatysty eki bap bar.
Olar:
laýazymdy tulǵanyń prokýrordyń usynýyn qaraýsyz qaldyrýy ne onda kórsetilgen zań buzýshylyqtardy joiý boiynsha sharalar qabyldamaýy, sonymen qatar ýaqtyly jaýap bermeýi - 8 AEK (29 536 teńge) mólsherinde aiyppul;
prokýrordyń qaraý nátijeleri men qabyldanǵan sharalar týraly habarlamaýy nemese ýaqtyly habarlamaýy - 200 AEK-ke (738 400 teńgege) deiingi aiyppul.
"Eger prokýrorlyq qadaǵalaý aktilerin oryndamaý azamattardyń nemese uiymdardyń quqyqtary men zańdy múddelerine ne qoǵamnyń nemese memlekettiń zańmen qorǵalatyn múddelerine eleýli ziian keltirýge ákelip soqsa, onda bul Qylmystyq kodekstiń 381-baby boiynsha qýdalanady", - deidi prokýrorlar.
Oblysta osyǵan uqsas buzýshylyq boiynsha jergilikti atqarýshy organdardyń taǵy 2 laýazymdy tulǵasy jaýapqa tartyldy.
