Aýdan ákimi Rýstam Ali Eskeldi aýdanynda turatyn jalǵyz ardager Eshenko Petr Mihailovichti Jeńistiń 76 jyldyǵymen quttyqtady.
Eshenko Petr Mihailovich 1943 jyly Qyzyl Ásker qataryna shaqyrylǵan. Belorýssiiany, Polshany, Ýkrainany azat etýge qatysyp, birneshe ret jaraqat alǵan.
1946 jyly III toptaǵy múgedek atanyp, demobilizatsiialandy. Aldymen kolhozda, keiin Sarqan aýdany Cherkassk elektr stantsiiasynda mashinist bolyp jumys istedi. Petr Mihailovich qurmet demalysyna shyqqanǵa deiin qurylys uiymdarynda jumys istegen. II dárejeli "Otan soǵysy" ordenimen jáne kóptegen jaýyngerlik jáne mereitoilyq medaldarmen marapattalǵan.
Óz kezeginde aýdan basshysy UOS ardagerin oblys ákimi A.Batalovtyń atynan quttyqtady. Rýstam Ali ardagerge soǵys kezindegi qajyrly eńbegi men kórsetken erligi úshin alǵys aityp, oǵan myqty densaýlyq pen uzaq ǵumyr tiledi. Sonymen qatar, ardagerge azyq-túlik sebetteri tabystaldy.
Uly Otan soǵysyna qatysýshylarǵa materialdyq qoldaý kórsetý-memlekettiń basymdyqtarynyń biri bolyp tabylady. Ardagerler men tyl eńbekkerleri eshqashan memlekettiń nazarynan tys qalǵan emes. Jeńis kúnine orai Qazaqstan Respýblikasy Prezidentiniń qaýlysy boiynsha Uly Otan soǵysyna qatysýshylarǵa bir million teńgeden tólendi. Al tyl eńbekkerleri 30 myń teńge qarjylai kómek aldy. Aita ketsek, aýdan boiynsha barlyǵy 315 tyl eńbekkerleri bar.
Mereke kúni aýdan ákiminiń bastamasymen ardagerdiń úiiniń aýlasynda mádeniet úii ártisteriniń qatysýymen merekelik kontsert uiymdastyryldy. Ardagerdiń kórshileri kontsertti qýana baqylap, ánniń áýenine qosylyp, qoshemet bildirdi.
Kezdesý sońynda aibyndy ardager jinalǵan qaýymǵa alǵys aityp, elimizge beibitshilik pen amandyq tiledi.
