Esimov ornyn bosatady

Dalanews 02 shil. 2015 23:24 249

«Almaty qalasynyń ákimi Ahmetjan Esimov Astana kúni merekesinen keıin ornyn bosatady». Osyndaı qaýeset el arasyn kezip júr. Esimov myrzany ákimdikten buǵan deıin de birneshe ret ketirip úlgergen jurt, bul jolǵy sybysty shynaıy aqparat dep otyr.

Almaty qalasyn uzaq ýaqyt basqarǵan Vıktor Hrapýnovtan keıin osy Esimov bolsa kerek. 2008 jyly sáýir aıynda ákim bolyp taǵaıyndalǵan ol qalanyń ósý-órkendeýi úshin óz halinshe eńbek etti. Biraq qala halqy men jýrnalıser qaýymy únemi ákimdi synaýmen keledi. Oǵan qysta qardyń ýaqtyly kúrelmeýi, tazalyqtyń nasharlaýy, ulttyq reńktegi sharalardyń az uıymdastyrylatyndyǵy, qaladaǵy bazarlardyń birinen soń biri órtenýi, aınalma joldar kezinde súrilgen baspanalarǵa mardymsyz ótemaqy tólengeni, mádenıet salasyna kóńil aýdarýdyń azaıýy, qala joldaryn jańartý kezinde shettegi shaǵyn kóshelerdiń jóndelmeýi, t.b. máseleler túrtki boldy. Áli de bolsa alyp megapolıstiń damý deńgeıine kóńili tolmaıtyn jurt kóp. Keıbir sarapshylar Almatynyń baıaý damýyna ákimshilik kináli emes degendi aıtady. Oǵan Almatynyń el astanasy mártebesinen aıyrylýy jáne saıası, ekonomıka qurylymdarynyń Astanaǵa shoǵyrlanýy sebep degen ýáj bildiredi.

Endi bir top Esimov ákim bolǵaly beri qalada keptelistiń azaıǵanyn, ákimniń daqpyrtsyz jolaıryqtaryn kóbeıtip, qara bazarlardy jónge salǵanyn aıtady. Ásirese, Esimov ákim bolǵan 6 jyldyń ishinde Almaty qalasynda onnan astam jolaıryqtary iske qosylyp, qaladaǵy kólik qozǵalysy bir jónge túskenin jetistik dep baǵalaıtyndar da bar.

Bizdińshe, Ahmetjan Esimov Almaty qalasy ákimdiginen bosaıdy degen sózdiń jany bar. Buǵan deıin elimizdegi basty qalalar men oblystardyń tizginin ustaǵandardyń kóbi aýysyp úlgerdi. Tipti, keıbir aımaqtardyń birneshe basshysy ornyn bosatyp, jańa basshylar taǵaıyndaldy. Tek aýyspaǵan Esimov qana.

Esimov endi qaıda barady? Bul jaǵy bizge beımálim. Aýylsharýashylyǵy mınıstrligine barady degen sybys bar.

Ahmetov Almatyǵa keledi...

DanıalAlmatyǵa ákim bolyp Shyǵys Qazaqstan oblysynyń ákimi Ahmetov keledi. Bul da joǵarydan jetken áńgimeniń bir úzigi. Danıal Ahmetov Úkimetti basqarǵan jyldar Qazaqstannyń damý deńgeıi joǵary bolǵanyn ekonomıkalyq sarapshylar jıi aıtady. 2004-2007 jyldar aralyǵy el ekonomıkasy artyp, áleýmetti salada nedáýir ilgerileý boldy. Qazir SHQO-ny basqarǵanyna jarty jyldan asty. Oblystyń áleýmettik salasyna, ásirese sút, bal óndirisine aıryqsha kóńil bólýdi qolǵa alǵan Ahmetov otandyq óndiristi damytý úshin bar kúshin sarp etetinin ispen dáleldep júr.

Almatyǵa Ahmetov kelse, nán shahardyń jańa tynysy ashylady degen úmit mol. Biraq SHQO-ny qolyna jańa alǵan ákimdi ne úshin aýystyrady? Buǵan basty sebep, Ahmetovtyń deńgeı-dárgeıi alyp qalany damytýǵa tolyq jetetindiginen bolsa kerek.

Aıtpaqshy, Ahmetovty Pavlodar jurtshylyǵy da oblysty basqarýǵa usynyp júrgen kórinedi. Olar kóziqaraqty ákimniń aımaqqa basshy bolyp kelýin qalaıtyndyqtaryn aıtyp júr. Buǵan deıin Ahmetov Pavlodarǵa ákim bolyp keledi eken degen áńgime el arasyna tarady.

Shyǵysqa Qul-Muhammed barady

mukhtar_a_kul_mukhammedBudan buryn, Prezıdent saılaýynyń aldynda «Muhtar qaıda barady?» degen shaǵyn saraptama jasaǵan edik. Sońǵy birer jylda Prezıdenttiń keńesshisi bolǵan Muhtar Qul-Muhammed saılaýdy oıdaǵydaı ótkizse mınıstrliktiń, ıakı basqa bir mańyzdy salanyń basshysy bolýy múmkindigi aıtylǵan. Muhtar myrza saılaýdy joǵary deńgeıde ótkizdi. Bul joly saılaý mereke ispetti boldy desek, qatelespeımiz. Usynys pen suranystyń arasynda eshqandaı kelispeýshilik bolmaǵan jaǵdaıda, mereke bolamaı qaıtsin?! Biraq eshqandaı basshylyq qyzmet, iri laýazym buıyrmaǵanyna tańyrqaǵan jurt kóp. Ádette, Prezıdenttiń kózine túsý ońaı emes. Prezıdent apparatynyń búgingi basshysy Nurlan Nyǵmatýlın  «Nur Otan» partıasy tóraǵasynyń birinshi orynbasary bolǵan kezin jaqsy paıdalana bildi. Burynǵynyń komsomoldaryndaı, zyryldap júrip, jarǵaq qulaǵy jastyqqa tımeı, el men jerdi aralady. Qazirgi qyzmetine sol kezdegi ábjil isteri septesti deıtinder kóp. Al Muhtar Qul-Muhamed te Nyǵmatýlınnen kem túsken joq, aı boıy aımaq bitkendi aralap shyqty. Demek, Muhtardyń jaı keńesshi bolýy múmkin emes...

Sonymen, jurt Muhtar Abrarulyn SHQO-nyń ákimi bolady dep júr. Bizdińshe, qısynǵa keletin baılam. Buǵan deıin bıliktiń ár satysynan ótken bilikti maman retinde ol oblysty oıdaǵydaı basqara alatynyna senim kámil. Sondaı-aq, óńir jurtshylyǵy Muhtar Qul-Muhammedti elshil, elgezek basshy retinde jaqsy qurmetteıdi.

Aldaǵy birer aptanyń ishinde elimizde iri taǵaıyndaýlar men oryn ózgertýler bolady degen sybys bar. Nede bolsa, Astana kúni merekesinen keıin biletin bolamyz.

 

 

Usynylǵan
Sońǵy jańalyqtar
x