Konferentsiia jumysyna Qazaqstanmen qatar Qyrǵyzstan, Mońǵoliia, Ózbekstan, QHR elderinen ǵalymdar men zertteýshiler qatysty. Konferentsiiany ashqan «Esik» memlekettik tarihi-mádeni mýzei-qoryǵynyń direktory Muhtarova Gúlmira Raiylqyzy qazirgi tańda mýzei-qoryǵynda jasalyp jatqan ǵylymi jumystar barysyna toqtaldy.
Ǵylymi konferentsiianyń plenarlyq otyrysynda ál-Farabi atyndaǵy Qazaq ulttyq ýniversitetiniń professory, tarih ǵylymdarynyń doktory, Dosbol Baiqonaqov, QHR Shansi provintsiiasy Arheologiialyq zertteý institýtynyń professory Din Ian, Astana mýzei direktsiialarynyń direktor orynbasary professor, tarih ǵylymdarynyń doktory, professor Marat Ábsemetov, «Ostrov Krym» ǵylymi-restavratsiialyq laboratoriiasynyń direktory, ǵalym-restavrator Qyrym Altynbekov syndy bilikti ǵalymdar men zertteýshiler baiandamalar oqydy.
Sheteldik jáne otandyq ǵalymdar men zertteýshiler arheologiialyq eskertkishter men tarihi-mádeni muralardy qorǵaý, saqtaý, paidalanýdyń joldaryn dalalyq izdenister boiynsha zerttegen, anyqtaǵan nysandarynda qoldanyp júrgen zamanaýi tehnologiialary jaily tyń oilaryn aityp, tájiribelerimen bólisti.
Sektsiialyq jumys barysynda Qazaqstannyń arheologiialyq eskertkishteri: tarihi-mádeni murany saqtaý jáne paidalaný joldary; dalalyq izdenister nátijeleri boiynsha tarihi-mádeni mura obektilerin zertteý jáne qorǵaýdyń dástúrli ádistemesi, zamanaýi tehnologiia jáne mýzei isiniń máseleleri syndy taqyryptar qarastyryldy.
Sektsiialyq otyrystarda «Sýlaiman Too» tarihi-arheologiialyq mýzei kesheniniń, Á.H.Marǵulan atyndaǵy Arheologiia institýtynyń, Ulytaý, Tańbaly, Botai tarihi-mádeni mýzei-qoryqtarynyń, ál-Farabi atyndaǵy Qazaq ulttyq ýniversitetiniń, «Uly Dala Eli» ortalyǵynyń jáne birqatar joǵary oqý oryndary ǵalymdary men ǵylymi zertteý institýttardyń zertteýshileri baiandama jasady.
Tarihi-mádeni muralardy saqtaý, qorǵaý ár azamattyń mindeti, sondyqtan osy salada atqarylatyn ister árqashan ózekti, endeshe «Esik» mýzei-qoryǵynda ótken Halyqaralyq konferentsiianyń mańyzydylyǵy men ǵylymilyǵy da erekshe boldy.
