Erjan Ámirbekuly Qazaqstan Respýblikasy Ǵylym jáne joǵary bilim ministrliginiń Joǵary jáne joǵary oqý ornynan keiingi bilim komitetiniń tóraǵasy qyzmetine taǵaiyndaldy, dep habarlaidy dalanews.kz.
Tiisti buiryqqa vedomstvo basshysy qol qoiǵan. Bul týraly Úkimettiń baspasóz qyzmeti habarlady.
Erjan Ámirbekuly 1976 jyly Jambyl oblysynda dúniege kelgen. M.H. Dýlati atyndaǵy Taraz memlekettik ýniversitetin támamdaǵan.
Eńbek jolyn 1998 jyly osy oqý ornynda oqytýshy bolyp bastaǵan. Keiin T. Rysqulov atyndaǵy Qazaq ekonomikalyq ýniversitetinde aǵa oqytýshy, professor jáne kafedra meńgerýshisi qyzmetterin atqardy.
2014–2015 jyldary QR Bilim jáne ǵylym ministrliginiń Ulttyq testileý ortalyǵynda basqarma jetekshisi boldy.
2015–2018 jyldary Qazaq ekonomika, qarjy jáne halyqaralyq saýda ýniversitetiniń Halyqaralyq biznes mektebin basqardy. Sonymen qatar akademiialyq qyzmet jáne ǵylym jónindegi prorektor qyzmetin atqardy.
2018–2020 jyldary Taraz memlekettik pedagogikalyq ýniversitetiniń rektory boldy.
2020–2021 jyldary Taraz óńirlik ýniversitetiniń rektory mindetin atqaryp, keiin rektor qyzmetine taǵaiyndaldy.
2021–2022 jyldary QR Bilim jáne ǵylym ministrliginiń Joǵary jáne joǵary oqý ornynan keiingi bilim departamenti direktorynyń orynbasary qyzmetin atqardy.
2022–2025 jyldary Y. Altynsarin atyndaǵy Arqalyq pedagogikalyq institýtynyń basqarma tóraǵasy – rektory boldy.
Al 2025 jylǵy qańtardan beri Álkei Marǵulan atyndaǵy Pavlodar pedagogikalyq ýniversitetiniń basqarma tóraǵasy – rektory qyzmetin atqaryp keldi.
Endi Erjan Ámirbekuly joǵary bilim salasyndaǵy negizgi baǵyttardyń biri – joǵary jáne joǵary oqý ornynan keiingi bilim komitetine jetekshilik etetin bolady.
