"Ermahan, ket!". Áigili boksshynyń ústinen aryz tústi
Belsendiler sailaý kúni ózderine qoqan-loqy kórsetken Ermahan Ibraimovtyń ústinen politsiiaǵa aryz beretinin málimdedi.
"25 qańtarda saǵat 10.00-de zańger Erlan Qalievpen birge Almaty politsiia departamentine Ermahan Ibraimovke aryz berýge baramyz", - dep jazdy Facebook-te "Demokratiialyq partiia" qurý jónindegi bastamashyl toptyń belsendisi Áigerim Tileýjan.
Boksshy Almatydaǵy Janbolat Mamai bastaǵan belsendiler uiymdastyrǵan ereýilge arnaiy barǵany jáne olardyń óz pikirin bildirýine qarsy ekenin aitqan.
"Janbolat Mamai men onyń jaqtastary"prezident - ket! Nur Otan - ket!"- degen osy tektes sózdermen plakat ustap turdy. Iaǵni, bul adamdar bizdiń otyz jyl boiy qurǵan qoǵamymyzǵa jáne onyń birligine qol suǵýdy oilaǵan. Janbolat Mamai degen kim?! Ol otyz jastaǵy áli ómirde eshteńege qol jetkize almaǵan boqmuryn. Al men óz elim úshin kúresip, memlekettiń dańqyn asyryp, túrli jarystarda Qazaqstannyń namysyn qorǵap, Olimpiada chempiony atandym. Sondyqtan men keibir adamdar osyndai qorlaityn urandarmen sóilei bastaǵanda, jai qarap tura almaimyn", - degen-tuǵyn boksshy.
Aita ketelik 10 qańtarda bilik opponenti Janbolat Mamaidyń jaqtastary sailaýǵa boikot jariialap, narazylyq bildirgen. Ermahan Ibraimov mitingige shyqqan jurtty úrkitip-qorqytyp, narazylyq bildirýshilerdiń plakattaryn qaq aiyrǵan.
Qaýipsizdik kúshteriniń qorshaýynda qalǵan belsendiler "Ermahan, ket!" dep aiqailady, sodan keiin boksshy oqiǵa ornynan ketip qalǵan edi.
