Semeide Borodýliha aýylynyń 20 jastaǵy turǵyny Dilnaz Jumaǵulovanyń ólimine qatysty sot protsesi bastaldy. Alǵashqy otyrysta prokýror aiyptaý nusqasy boiynsha qylmystyń mán-jaiyn jariialady, dep habarlaidy dalanews.kz.
Stan.kz basylymynyń jazýynsha, qaiǵyly oqiǵa biyl 13 shildege qaraǵan túni bolǵan. Qyzdyń denesi keiin jol boiynan tabylǵan.
Prokýrordyń aitýynsha, sol túni Dilnaz burynǵy jigitine Borodýliha aýylynyń ortalyǵynda kezdesýdi usynǵan. Qyz ony dosymen birge kútip alyp, keiin dosymen qoshtasqan soń jigitpen sóilesýdi jalǵastyrǵan.
Aiyptaý tarapynyń nusqasy boiynsha, kóshede kele jatqanda ekeýiniń arasynda janjal týyndaǵan. Osydan keiin aiyptalýshy qyzǵa kúsh qoldanyp, pyshaq jaraqattaryn salǵan.
"Sottalýshy qaltasynan aldyn ala daiyndap qoiǵan jinalmaly pyshaqty shyǵarǵan. Óz áreketi jábirlenýshiniń ólimine ákelýi múmkin ekenin túsine otyryp, sottalýshy marqumnyń moiyn tusyna soqqy jasap, uiqy arteriiasyn zaqymdaǵan. Jumaǵulova jaraqatyn qolymen basyp, otyra ketken. Onyń aiqailap jiberýinen qoryqqan sottalýshy ony eseńgiretý maqsatynda pyshaq sabynyń túbimen basynyń tóbe jáne shúide tustaryna qatty soqqy jasaǵan", – delingen aiyptaý aktisinde.
Aiyptaý aktisinde jábirlenýshige birneshe ret pyshaq jaraqaty salynǵany kórsetilgen. Keiin aiyptalýshy qyzdyń denesin aýyl shetine aparýǵa áreket jasap, aqyrynda ony úiler mańyndaǵy topyraq jolda qaldyryp ketken degen nusqa aityldy.
Sot-meditsinalyq saraptama qorytyndysy boiynsha, qyzdyń ólimi kóp qan joǵaltýdan bolǵan.
Prokýror kúdiktige Qylmystyq kodekstiń 99-babynyń 1-bóligi – «adam óltirý» boiynsha aiyp taǵylǵanyn málimdedi.
Al marqumnyń ata-anasy istiń bulai saralanýymen kelispeidi. Olar jaraqattardyń sipatyn eskere otyryp, aiyptalýshynyń áreketi Qylmystyq kodekstiń 99-babynyń 2-bóligi, iaǵni aýyrlatatyn mán-jailarda adam óltirý retinde qaralýy kerek dep esepteidi.
Is boiynsha sot talqylaýy jalǵasyp jatyr. Aiyptalýshynyń kinási sottyń zańdy kúshine engen úkimimen anyqtalady.
