«AMANAT» partıasynyń Tóraǵasy Erlan Qoshanov óz sózinde Prezıdent Qasym-Jomart Toqaevtyń Ulttyq quryltaıda usynǵan «Ádiletti Qazaqstan men Adal azamat» konsepsıasyna erekshe nazar aýdardy.
«Ádilet pen adaldyq – ajyramas uǵymdar. Al osy uǵymdardyń saltanat qurýy úshin qoǵamdyq sana men áleýmettik qundylyqtar ózgerýi kerek. Sonda ǵana kózdegen maqsatymyzǵa jetemiz. Bul bizge de qatysty. Osy jolda «AMANAT» partıasy barlyq ıgi isterdiń alǵy shebinde júrýi tıis. Halyqtyń senimi bizge kúsh beredi. Sol senimniń arqasynda, ótken saılaýda Májiliste de, máslıhattarda da basym daýysqa ıe boldyq. Premer-Mınıstrdiń kandıdatýrasyn usyndyq.
Mınıstrlerdi taǵaıyndadyq. Máslıhattaǵy fraksıalarymyz oblystar men megapolısterdiń ákimderin taǵaıyndady. Bir sózben aıtqanda, «AMANAT» zor abyroı men orasan jaýapkershilik degendi bildiredi», – dedi ol.
Erlan Qoshanov atap ótkendeı, «AMANAT» partıasy úsh naýqannyń – prezıdenttik jáne parlamenttik saılaýdyń, sondaı-aq jalpyulttyq referendýmnyń qozǵaýshy kúshi boldy.
«Bul bizdiń partıamyzdyń ınstıtýsıonaldyq turaqtylyǵynyń kórsetkishi. «AMANAT» partıalyq vertıkaldyń jumys isteıtinin jáne azamattar partıaǵa senim artatynyn dáleldedi. Qazir máslıhat depýtattaryna partıalyq vertıkalǵa tolyq qosylýǵa, onyń resýrstary men múmkindikterin paıdalanýǵa, sheshimder ázirlep, ony qabyldaýǵa múmkindik berý mańyzdy. Jalpy, kelesi saılaýda kadr rezervin birinshi kezekte máslıhat depýtattarynan – belsendi, adal, halyq arasynda senim men bedelge ıe azamattaradan qalyptastyrý kerek dep sanaımyn», – dedi ol.
Partıa Tóraǵasy amanattyq depýtattar ákimdiktermen ózara tıimdi qarym-qatynas jasaýy tıis ekenin, sebebi saılaýaldy ýádelerdi oryndaý osyǵan kelip tireletinin erekshe atap ótti.
«Máslıhat depýtattarynyń ókilettilik aıasy keń, olar óńirdiń damýyna yqpal ete alady. Dál osy máslıhat depýtattary oblys ákimin saılaıdy, tekserý komısıalaryn quryp, aýmaqtardy damytý baǵdarlamalary men búdjetti bekitedi.
Bul – máslıhattar ákimdiktermen qatar óńirlerdegi ómir sapasyna jaýapty degen sóz», - dedi ol.
Erlan Qoshanov máslıhattarǵa esep berý, baǵdarlamalar men búdjetti bekitý tek qaǵaz júzinde bolmaýy tıis ekenin atap ótti. Jergilikti deńgeıde pikirtalastar bolýy qajet. Onda depýtattar óz saılaýshylarynyń múddesin qorǵaýy kerek.
«Báriniń birdeı kóńilinen shyǵýǵa degen nıet memlekettiń strategıalyq maqsattaryna kedergi keltirmeýi tıis. Synnyń bolǵany durys, biraq popýlızmge jol bermeýimiz kerek. Ákimdikter men máslıhattar ózara básekeles te, qarsylas ta emes, seriktester», – dep atap ótti Erlan Qoshanov.
QR Premer-mınıstri Álıhan Smaıylov Memleket basshysynyń Saılaýaldy tuǵyrnamasyn jáne «AMANAT» partıasynyń baǵdarlamasyn iske asyrý Úkimet jumysynyń negizi ekenin atap ótti.
«Osy baǵdarlamalyq qujattardy tıimdi iske asyrý halyqtyń ómir súrý deńgeıin arttyrýǵa múmkindik beredi. Aldymyzdaǵy maqsattarǵa qol jetkizý úshin qajetti resýrstardyń barlyǵy bar. Qoıylǵan mindetterge qol jetkizý máslıhattardyń da belsendi qatysýyn talap etedi», – dedi ol.
Sondaı-aq Úkimet basshysy aýyl turǵyndarynyń tabysyn arttyrýǵa arnalǵan «Aýyl amanaty» jobasyn júzege asyrýǵa bıyl 100 mlrd teńge bólinetinine toqtaldy.
«Joba 7 jylda 1 mln-nan astam aýyl turǵynyn qamtıdy. Buǵan 1 trln teńge qarastyryldy. Agroónerkásiptik keshende 536 mlrd teńgeni quraıtyn 300-ge jýyq joba júzege asyrylýda. Kóktemgi egis jáne oraq naýqanyn jeńildikpen nesıelendirý kólemi bıyl 140 mlrd teńgege deıin ulǵaıdy. Aýyl sharýashylyǵy tehnıkasyna jeńildikpen nesıe berý mólsheri 145 mlrd teńgege jetti», - dedi Úkimet basshysy.
QR Memlekettik keńesshisi Erlan Qarın qoǵamdyq sana ózgermeı, memleket pen qoǵamnyń jańa sapasy qalyptaspaıdy dep esepteıdi. Ol prezıdenttik reformalardyń máni negizgi saıası ınstıtýttardy nyǵaıtý ekenin atap ótti.
«Eń basty mindet – reformalardy júzege asyrý ǵana emes, olardy búkil qoǵam bolyp júrgizý. Sondyqtan, saıası jańǵyrtý baǵdarlamasyn iske asyrý Konstıtýsıaǵa ózgerister engizýdi talap etken kezde, Prezıdent jalpyulttyq referendým ótkizý jóninde bastama kóterdi. Referendým nátıjesi qoǵamdyq toptasýdyń sapaly jańa deńgeıge shyqqanyn aıǵaqtady. Muny prezıdenttik jáne parlamenttik saılaý qorytyndysy da rastady», - dedi ol.
Forým delegaty, Abaı oblystyq máslıhatynyń depýtaty Shaǵangúl Janaeva «AMANAT» partıasy kez kelgen qıyndyqta birinshi bolyp halyqqa qol ushyn sozatynyn atap ótti.
«Jaqynda Abaı oblysynda oryn alǵan órt kezinde «Jastar Rýhy» Jastar qanatynyń 500-den astam eriktisi oqıǵa ornynda jumys istedi. Olar zardap shekken turǵyndarǵa kómektesip, órt sóndirýshilerdi tamaqtandyrdy, úıindilerdi tazartty.
Bul «AMANAT» partıasynyń jaýapty saıası kúsh ekeniniń aıqyn kórsetkishi», - dedi ol.
Óz kezeginde forým delegaty, Qaraǵandy oblystyq máslıhatynyń depýtaty Evgenıı Býslaev zıandy jáne qaýipti óndiristerdiń qyzmetkerlerin zeınetke erte shyǵarý máselesin kóterdi. Ol bul máseleni partıa óz saılaýaldy baǵdarlamasyna engizip, sheshýdi kózdep otyrǵanyn jetkizdi.
Forým delegaty, Jańaózen qalalyq máslıhatynyń depýtaty Asqar Noǵaevtyń aıtýynsha, halyq qalaýlylary munaı-gaz salasynda jıi kezdesetin eńbek daýlaryn sheshýge árdaıym atsalysady.
Forým delegaty, Almaty qalasy máslıhatynyń depýtaty Ásıa Aqanova mınıstrler men ákimder esep beretin kóptegen bastamanyń «AMANAT» partıasynyń saılaýaldy baǵdarlamalaryn oryndaý aıasynda júzege asyrylyp jatqanyna nazar aýdardy. Depýtattar bılik pen halyq arasynda kópir bolyp, azamattardyń múddelerin qorǵaýy jáne qordalanǵan máselelerdi sheshýge kómektesýi tıis.
Ózderińiz biletindeı, jaqynda «Zańsyz ıelengen kapıtaldy qaıtarý týraly» zań qabyldandy. Forým delegaty, Májilis depýtaty Erlan Saırov at tóbelindeı top shet elge mıllıardtaǵan dollardy shyǵaryp áketkenin málimdedi. Ol urlanǵan qarajatty elge qaıtarý jumysyn aıaǵyna deıin jetkizý qajet ekenin atap ótti. Osy másele boıynsha partıa músheleri barlyq deńgeıde naqty is-qımyl jasaý kerek. Bul – halyqtyń talaby.
Aıta keteıik, óńirlerdiń teńgerimdi damýyn qamtamasyz etý – partıa Saıası tuǵyrnamasynyń basymdyqtarynyń biri.
Eske sala keteıik, Parlament Májilisindegi «AMANAT» fraksıasynyń músheleri 2023-2027 jyldarǵa arnalǵan «Halyqpen birge!» dep atalatyn saılaýaldy baǵdarlamany júzege asyrýdyń respýblıkalyq jáne 20 óńirlik jol kartasyn bekitti. Atap aıtqanda, 78 mln. sharshy metrden astam jańa turǵyn úı salý, mektepke deıingi uıymdarda 300 myń, mektepterde 1,5 mln. oryn ashý, halyqty 100% sýmen jabdyqtaýǵa qoljetimdiligin qamtamasyz etý, shaǵyn bıznes úshin 15 myń kedergini joıý jáne t.b.
Forým aıasynda «AMANAT» partıasynan máslıhat depýtattary beıindi mınıstrlerdiń qatysýymen paneldik sesıalar aıasynda oqytý semınarlaryn ótkizdi.
