– Osyǵan deıin habarlaǵanymdaı, Ulttyq keńestiń ekinshi otyrysynan keıin, Prezıdent Ákimshiliginiń jetekshisi qolymen Prezıdenttiń jańa bastamalaryn júzege asyrý boıynsha Jospar bekitildi. Osy josparǵa sáıkes tıisti memlekettik qurylymdar qańtar aıynda saıası reformalar baǵytyna qatysty ár bastama boıynsha zań jobalaryn daıyndaý qajet bolatyn.
Birneshe kún buryn bul jumys aıaqtaldy. Endi prezıdenttik bastamalardy júzege asyrýdyń jańa kezeńi bastalǵaly jatyr.
Zań jobalary múddeli memlekettik organdarmen kelisilgennen keıin, ǵylymı lıngvısıkalyq ekspertızadan ótip, jáne Úkimettiń otyrysynda talqylanǵannan soń, olar Parlamentke qalyptasqan tártipke sáıkes qarastyrýǵa engiziledi, – dep jazdy Erlan Qarın Facebook-tegi paraqshasynda.
Sondaı-aq, Erlan Qarın Prezıdent Ulttyq keńestiń ekinshi otyrysynda jarıalaǵan bastamalary belsendi júzege asyrylyp jatqanyn alǵa tartypty.
Eske sala ketsek, 20 jeltoqsan kúni elordada QR Prezıdenti Qasym-Jomart Toqaev Ulttyq qoǵamdyq senim keńesiniń ekinshi otyrysyn ótkizgen bolatyn. Memleket basshysy tabysy az otbasylardyń balalary naqty qoldaý sharalarymen qamtylatynyn jetkizip, Úkimettiń aldyna ashyq ári ádil ataýly kómekpen qamtamasyz etý mindetin qoıdy. Prezıdent memlekettiń tek muqtaj jandarǵa ǵana járdem berýi tıis ekenin jetkizdi.
