– وسىعان دەيىن حابارلاعانىمداي، ۇلتتىق كەڭەستىڭ ەكىنشى وتىرىسىنان كەيىن، پرەزيدەنت اكىمشىلىگىنىڭ جەتەكشىسى قولىمەن پرەزيدەنتتىڭ جاڭا باستامالارىن جۇزەگە اسىرۋ بويىنشا جوسپار بەكىتىلدى. وسى جوسپارعا سايكەس ءتيىستى مەملەكەتتىك قۇرىلىمدار قاڭتار ايىندا ساياسي رەفورمالار باعىتىنا قاتىستى ءار باستاما بويىنشا زاڭ جوبالارىن دايىنداۋ قاجەت بولاتىن.
بىرنەشە كۇن بۇرىن بۇل جۇمىس اياقتالدى. ەندى پرەزيدەنتتىك باستامالاردى جۇزەگە اسىرۋدىڭ جاڭا كەزەڭى باستالعالى جاتىر.
زاڭ جوبالارى مۇددەلى مەملەكەتتىك ورگاندارمەن كەلىسىلگەننەن كەيىن، عىلىمي لينگۆيستيكالىق ەكسپەرتيزادان ءوتىپ، جانە ۇكىمەتتىڭ وتىرىسىندا تالقىلانعاننان سوڭ، ولار پارلامەنتكە قالىپتاسقان تارتىپكە سايكەس قاراستىرۋعا ەنگىزىلەدى، – دەپ جازدى ەرلان قارين Facebook-تەگى پاراقشاسىندا.
سونداي-اق، ەرلان قارين پرەزيدەنت ۇلتتىق كەڭەستىڭ ەكىنشى وتىرىسىندا جاريالاعان باستامالارى بەلسەندى جۇزەگە اسىرىلىپ جاتقانىن العا تارتىپتى.
ەسكە سالا كەتسەك، 20 جەلتوقسان كۇنى ەلوردادا ق ر پرەزيدەنتى قاسىم-جومارت توقايەۆ ۇلتتىق قوعامدىق سەنىم كەڭەسىنىڭ ەكىنشى وتىرىسىن وتكىزگەن بولاتىن. مەملەكەت باسشىسى تابىسى از وتباسىلاردىڭ بالالارى ناقتى قولداۋ شارالارىمەن قامتىلاتىنىن جەتكىزىپ، ۇكىمەتتىڭ الدىنا اشىق ءارى ءادىل اتاۋلى كومەكپەن قامتاماسىز ەتۋ مىندەتىن قويدى. پرەزيدەنت مەملەكەتتىڭ تەك مۇقتاج جاندارعا عانا جاردەم بەرۋى ءتيىس ەكەنىن جەتكىزدى.
