Qazylar alqasynyń tóraǵasy, kórnekti óner qairatkeri Asanáli Áshimov túrki áleminiń rýhani astanasyn dúbirge bólegen aitýly dodanyń máni men mańyzyna toqalyp, jyly lebizin bildirdi.
«Túrkistan – er túriktiń besigi» dep Maǵjan Jumabaev jyrlaǵan uly, tarihi qalada «Altyn dombyrany» ótkizeiik degen sheshim qabyldandy. Onysy durys. Ataǵy men abyroiy bar aqyndardyń jaqsylary kelip, halyqqa osynda óner kórsetti. Túrkistan halqynyń ál-aýqaty túzelip, mádenieti kóterilsin dep tileimin. El aman bolsyn!», – dedi Asanáli Áshimov.
Eki kúnge sozylǵan jyr báigesinde aqyndar ult qairatkeriniń órnekti ómir joly men eseli eńbegin, jankeshti qyzymetin jyrǵa qosty. Kóziqaraqty kórermenniń kóńilin kóterip, sóz barymtasy jarasymdy ázil, kelisti qaljyńmen órildi. Al tartysty dodanyń aqtyq kezeńinde Birjan Baitýov pen Rústem Qaiyrtaiuly jáne Erkebulan Qainazarov pen Shuǵaiyp Sezimhan óner kórsetti.
Sóitip, bir kezderi osy Túrkistan óńirinen túlep ushqan Erkebulan Qainazarov qazylar alqasynyń sheshimimen «Altyn dombyra-2022» iegeri atandy. Jeńimpazǵa «Altyn dombyra» jáne 3 mln teńge kóleminde syiaqy tabystaldy.
Al, júldeli I oryndy almatylyq Rústem Qaiyrtaiuly ielendi. II orynǵa Birjan Baitýov pen Shuǵaiyp Sezimhan laiyq dep tanyldy. III oryndy Talǵat Myqi (BQO), Haziret Berdihan (Almaty) jáne Móldir Aitbai (Qyzylorda) ózara bólisti. Arnaiy júlde Nurlan Esenqulovqa (Túrkistan), Arǵynbek Qalbaevqa (Mańǵystaý) jáne Qalijan Bildáshevke (Shymkent) buiyrdy. Barsha aqynǵa qarjylai syi-siiapat jasaldy.
Aitys aqyndary men jyrshy-termeshilerdiń halyqaralyq odaǵynyń tóraǵasy Júrsin Ermannyń sheshimimen Birjan Baitýov pen Rústem Qaiyrtaiuly «Aitystyń aqtańgeri» atandy. Óz kezeginde, Erkebulan Qainazarov «Altyn dombyrany» Túrkistan qalasynda qaldyrý týraly sheshim qabyldady. Ol «Uly dala eli» ortalyǵy ekspozitsiiasyna qoiylady.
https://dalanews.kz/saraptama/84552-toqaevtyng-uadesi-qazaqstanda-balala
