Departamenttiń baspasóz qyzmetiniń habarlaýynsha, qazaqstandyq shoý-bıznes ókilderiniń arasynda kólik salyǵyn tólemegender bar. Juldyzdar 400 myń teńgeden asa salyq tólemegen. Atap aıtqanda, ánshi Ernar Aıdar – 205,1 myń teńge, Rano Ýmarova – 88,8 myń teńge, Jeńis Ysqaqova – 73,2 myń teńge, Erke Esmahan – 41,1 myń teńge bereshek.
– Bul azamattarǵa qatysty is materıaldary jınaqtalyp, sot organdaryna berildi. Sot organdary qaryzdy óndirý týraly úkim shyǵardy, – dedi baspasóz qyzmetinen. Salyq qaryzy týraly aqparatty elektrondy servıs arqyly QR Qarjy mınıstrligi Memlekettik kirister komıtetiniń kgd.gov.kz saıtynan kórýge bolady.
Qalalyq departament 31 jeltoqsanda 2017 jylǵy kólik salyǵyn tóleý merzimi aıaqtalatynyn habarlaıdy. Aıta ketý kerek, 2016 jyldan bastap kólik salyǵy tóleýshiniń turǵylyqty jeri boıynsha tólenedi. 2017 jyldyń 5 jeltoqsanyndaǵy málimet boıynsha 90 myń Almaty turǵyny 4,2 mlrd teńge qaryz. Onyń ishinde 19213 boryshkerdiń isi sotqa jiberildi. 3 653 adamǵa shetelge shyǵýǵa tyıym salyndy. 2849 adamnyń múlkine tyıym salyndy.
