Taıaýda Qazaq memlekettik Qyzdar pedagogıkalyq ýnıversıtetinde qajet emes zattardan jasalǵan buıymdarǵa arnalǵan erekshe kórme ótti. Mektepke deıingi jáne bastaýysh kafedrasy turmystyq zattardyń qaldyqtarynan jańa zat jasaý arqyly stýdentterdiń shyǵarmashylyǵyn damytý, pedagogıkalyq mamandyq stýdentteriniń ekologıalyq mádenıeti men kórkem shyǵarmashylyq salasyndaǵy kásibı quzirettilikterin qalyptastyrý maqsatynda uıymdastyrǵan.

Mektepke deıingi jáne bastaýysh kafedrasynyń meńgerýshisi Tursynaı Baınazarova: «Kórme ótkizý ıdeıasy stýdentterdi shabyttandyrdy. Búgin tamasha jumystarǵa kýá boldyńyzdar. Biz eńbekke baýlıtyn pánderde ǵana jańa zattardy jasaýdy úıretetin bolsaq, endigi kezekte kez kelgen qyzyǵýshy jan arnaıy úıirmege qatysa alady. Jańa «Sheber qoldar» úıirmesin ashatyndyǵymyzdy habarlaımyz», – dep, jastardyń qolónermen aınalysýyna shabyttandyratyn úıirme týraly súıinshi habaryn jetkizdi.

Qıal júıriktigi men  jańasha oılaý qabiletterin tanytýdy mindet dep tapqan pedagogıka jáne psıhologıa i men «QazNur» gýmanıtarlyq kolejiniń stýdentteri kórmege erekshe atsalysty. Óz mamandyqtary boıynsha kásibı ósýge sep bolatyn sharaǵa plasık bótelkelerden, qaqpaqtardan, lampalardan, gúlshoǵy oralǵan qaǵaz, lenta, karton, dısk syndy paıdalanylǵan zattardy qoldana otyryp jańa dúnıeler jasaǵan. Ár jumystyń ataýy, avtory kórsetilip, qazylar alqasyna usynyldy.

– Bastaýysh bilim beretin mamandary óte jan-jaqty ári izdenimpaz bolý kerek. Bul salany tańdaǵan pedagogtar óte ámbebap maman dep aıtýǵa bolady. Muǵalim oqýshylarǵa tek qana árip tanytyp, esep shyǵartý ǵana emes, án de aıtqyzyp, sýret te saldyryp úıretedi. Sondyqtan da osyndaı sharalar arqyly kásibı damytýǵa úles qosamyz. Bizdiń aldymyzdan tálim alyp jatqan búgingi stýdentter erteń balalardy qyzyqtyrýǵa, qolónermen aınalysýǵa, ushqyr oılaýǵa úıretetin sheberge aınalý kerek», – deıdi qyryq jyldan astam pedagogıkalyq tájirıbesi bar ulaǵatty ustaz Tatána Levchenko.

«Kóńildi ferma», «Kıra toraı», «Altyn balyq» degen ataýlardy alǵan san alýan zattar kózdiń jaýyn alady. Balanyń oılaý qabiletin damytýǵa áser etetin, ońaı ári tez jasalatyn zattar kórnekilik qural retinde paıdalanýǵa da ábden bolady. Kórmege qoıylǵan zattardy ár toptyń belsendileri tanystyryp, qandaı zattardy qoldanǵandyqtaryna toqtalyp ótti. Tipti, týyndylaryn óleń joldarymen tanystyrǵan belsendi stýdentter óz mamandyqtaryn shyn yqylaspen tańdaǵandyqtaryn kórsetti.

Kórmege qoıylǵan zattar ózindik ereksheligi, estetıkalyǵy, ekologıalyq qundylyǵy, paıdalanylǵan materıaldardyń ártúrliligi boıynsha sarapqa salynyp, eń úzdikteri anyqtaldy. Qorytyndysy boıynsha «Bastaýysh oqytý pedagogıkasy men ádistemesi» mamandyǵynyń 3-kýrs stýdentteri: Karına Shabdan, Ásel Ábilqaıyrova, Raýshan Sadyqovanyń jumystary Bas júldege ıe boldy. Al «Bastaýysh oqytý pedagogıkasy men ádistemesi mamandyǵynyń 4-kýrs stýdenti Nurbúbi Imardjanova, «Mektepke deıingi oqytý jáne tárbıeleý» mamandyǵynyń 3-kýrs stýdenti Nursulý Jaqybaı İ oryn ıelense, «Mektepke deıingi oqytý jáne tárbıeleý» mamandyǵynyń 2 jáne 3-kýrs stýdentterinen  202, 302 toby jasaǵan jumystar İİ orynǵa laıyq dep tanyldy. «Bastaýysh oqytý pedagogıkasy men ádistemesi» mamandyǵynyń 2-kýrs stýdentteri, ıaǵnı 205 top pen 2-kýrs stýdentteri Aıaýlym Saǵatjan, Ánel Sultanbekova, Olga Shegaı İİİ oryn aldy.

– Biz sabaqta óz mamandyǵymyzǵa qatysty pánderdiń barlyǵyn ótemiz. Eńbekke baýlý páni boıynsha shyǵarmashylyq jumystarmen aınalysyp kelemiz. Osyndaı baıqaýǵa qatysqanymyzǵa qýanyshtymyz. Básekelese otyryp jaqsy nátıje shyǵara alamyz, – deıdi pedagogıka jáne psıhologıa fakúltetiniń 2-kýrs stýdenti Erkejan Qaımollaeva.