Túrkıa Prezıdenti Taıyp Erdoǵan Reseı ushaǵyn atyp túsirgen túrik áskerıleri jazalanatynyn, sol keleńsiz oqıǵa úshin keshirim suraıtynyn aıtyp, Reseıge hat jazǵany habarlandy. Bul týraly álemdik aqparat quraldary jarysa jazyp jatyr. Túrkıa premeri Bınalı Iyldyrym resmı Ankara túrik áskeri atyp túsirgen Reseı ushaǵy úshin aqshalaı ótemaqy tóleýge daıyn ekenin de jetkizipti.

Erdoǵan eki el múddesine saı kelmeıtin kıkiljińdi doǵaryp, elaralyq qarym-qatynasty tez rettegisi keletinin buǵan deıin bildirgen bolatyn.

Esterińizge sala keteıik, 2015 jyly qarashanyń 24-i kúni Túrkıa áýe qorǵanysy kúshteriniń áskerı ushaǵy «áýe keńistigimizge kirip ketti» dep, Reseıdiń SÝ-24 ushaǵyn atyp qulatqan. Bul oqıǵadan keıin túrik prezıdenti Rejep Taıyp Erdoǵan «Reseı ushaǵynyń Túrkıanyń Sırıamen shekarasyn buzyp kirgenin, biraq óz eliniń ushaq atý oqıǵasyna qatysy Reseımen qarym-qatynasyn ýshyqtyrǵysy kelmeıtinin aıtqan-tyn. Ushaqtan parashútpen sekirip túsken ushqyshtardyń birin «Sırıadaǵy kóterilisshiler atyp óltirgeni» habarlanǵan. Reseı prezıdenti Vladımır Pýtın bul oqıǵany «tý syrtymyzdan berilgen soqqy» dep atap, Túrkıaǵa sanksıa jarıalaǵan edi.