Túrkiia prezidenti Rejep Taiyp Erdoǵan Armeniiadan "Ázerbaijannyń okkýpatsiialap alǵan jerinen tez arada ketýi kerek" dep málimdedi.
"Armeniianyń Taýly Qarabaqty okkýpatsiialap alýymen bastalǵan aimaqtaǵy janjaldy toqtatýǵa ýaqyt keldi. Ázerbaijannyń shydamy taýsyldy. Baký óz kúshimen armian okkýpatsiiasyna qarsylyq bildirip, núkte qoiyp jatyr",- dedi Erdoǵan.
Armeniia syrtqy ister ministrligi Ankarany "Ázerbaijanǵa ásker jiberip jatyr" dep aiyptady.
Ázerbaijan men Armeniia shekarasynda 27 qyrkúiekten beri qarýly qaqtyǵys bolyp jatyr. Eki tarap birin biri kinálap jatyr.
Erevan Bakýdy "Taýly Qarabaqqa qol suqty" dep aiyptap, elinde áskeri jaǵdai jariialaǵan. Ázerbaijan bolsa "Armeniia birinshi bolyp shabýyl jasady" dep, "Taýly Qarabaqtaǵy soǵysty otan úshin soǵys" dep málimdedi.
Halyqaralyq qaýymdastyq moiyndamaǵan Taýly Qarabaq aimaǵynyń ásker jetekshileri qaqtyǵystyń ekinshi kúni 15 jaýynger mert bolǵanyn habarlady. Olar atystyń birinshi kúninde 16 ásker oqqa ushqanyn málimdegen. Resmi málimet boiynsha, Qarabaqtyń 31 jaýyngeri jáne eki beibit turǵyn qaza bolǵan.
Armeniia qorǵanys ministri Artsrýn Ovannisian atys kezinde 100-ge tarta adam jaralanǵanyn, olardyń bir bóligi Erevanǵa jetkizilgenin aitty.
Ázerbaijan qorǵanys ministrligi 550-den kóp ásker oqqa ushqanyn habarlady. Biraq Erevan bul aqparatty teriske shyǵardy.
Halyqaralyq qaýymdastyq taraptardy tez arada soǵysty toqtatýǵa, kelissózge kelýge shaqyryp jatyr.
Taýly Qarabaq tóńireginde daý Sovet Odaǵy kezinen bastalǵan. Ol kezde Taýly Qarabaq aýdany Ázerbaijan SSR-i quramyna kirgen, biraq turǵyndarynyń kóbi armian bolǵan. 1988-1994 jyldary aralyǵynda bolǵan áskeri qaqtyǵys kezinde 30 myń adam qaza taýyp, júzdegen myń adam bosqynǵa ainalǵan. Armeniia áskeriniń qoldaýyna ie bolǵan separatister Taýly Qarabaqtyń basym bóligin baqylaýyna alyp, óziniń qaramaǵyna Ázerbaijanǵa tiesili kei aýdandardy da tirkep aldy. Ázerbaijan bul territoriiany okkýpatsiialanǵan dep ataidy. 1994 jyly eki el arasynda qarýly qaqtyǵysty toqtatý jáne shielenisti beibit jolmen sheshý jóninde kelisim jasaldy. Biraq bul kelisim shielenisti sheshken joq.
