Qadyrovtyń sózinshe, qazirgi petitsiia jariialaityn platformalar resmi emes.
“Zań jobasy qabyldanǵan jaǵdaida zańmen retteletin resmi aqparattyq platforma paida bolady. Ol E-otinish portalynda jeke modýl bolyp belgilenedi. Eger másele laýazymǵa taǵaiyndaý nemese bosatý prezident, parlament, sonymen qatar úkimettiń quzyretine kiretin bolsa, bul másele petitsiia arqyly sheshilmeidi.
Ministrlerdiń otstavkasy referendým arqyly da qarastyrylmaidy. Referendým týraly konstitýtsiialyq zańda solai kórsetilgen. Jergilikti aýyldyq okrýgter ákimderiniń sailaýy ótkenin bilesizder. Qazir aýdandar men oblystyq mańyzy bar qalalardyń ákimderin sailaý bastalyp jatyr.
Prezident pen Parlament depýtattaryn da halyq sailaityndyqtan, olardyń kelisimimen taǵaiyndalatyn úkimet músheleriniń laýazymǵa ie bolýy da janama túrde el azamattarynyń tańdaý quqyǵynyń saqtalǵanyn kórsetedi”, – deidi vitse-ministr.
Osy oraida tilshimiz sheneýnikten bul shekteý bilikke halyqtyń únin jetkizýde kedergi bolmai ma dep surady.
“Petitsiianyń eń basty maqsaty – azamattardyń memleketti basqaý isine aralasýy. Halyqtyń úndeýi shaǵym emes, usynys retinde qarastyrylady. Al eger ol usynys zańǵa qaishy keletin bolsa, qarastyrylmaidy”, – dedi Daniiar Qadyrov.
Eske sala ketsek, almatylyqtar qala ákimi Erbolat Dosaevty jumystan bosatýdy talap etse, el turǵyndary Mýsinniń otstavkaǵa ketýin talap etken petitsiiaǵa qol qoiǵan bolatyn.
