قادىروۆتىڭ سوزىنشە، قازىرگى پەتيسيا جاريالايتىن پلاتفورمالار رەسمي ەمەس.
“زاڭ جوباسى قابىلدانعان جاعدايدا زاڭمەن رەتتەلەتىن رەسمي اقپاراتتىق پلاتفورما پايدا بولادى. ول ە-otinish پورتالىندا جەكە مودۋل بولىپ بەلگىلەنەدى. ەگەر ماسەلە لاۋازىمعا تاعايىنداۋ نەمەسە بوساتۋ پرەزيدەنت، پارلامەنت، سونىمەن قاتار ۇكىمەتتىڭ قۇزىرەتىنە كىرەتىن بولسا، بۇل ماسەلە پەتيسيا ارقىلى شەشىلمەيدى.
مينيسترلەردىڭ وتستاۆكاسى رەفەرەندۋم ارقىلى دا قاراستىرىلمايدى. رەفەرەندۋم تۋرالى كونستيتۋسيالىق زاڭدا سولاي كورسەتىلگەن. جەرگىلىكتى اۋىلدىق وكرۋگتەر اكىمدەرىنىڭ سايلاۋى وتكەنىن بىلەسىزدەر. ءقازىر اۋداندار مەن وبلىستىق ماڭىزى بار قالالاردىڭ اكىمدەرىن سايلاۋ باستالىپ جاتىر.
پرەزيدەنت پەن پارلامەنت دەپۋتاتتارىن دا حالىق سايلايتىندىقتان، ولاردىڭ كەلىسىمىمەن تاعايىندالاتىن ۇكىمەت مۇشەلەرىنىڭ لاۋازىمعا يە بولۋى دا جاناما تۇردە ەل ازاماتتارىنىڭ تاڭداۋ قۇقىعىنىڭ ساقتالعانىن كورسەتەدى”، – دەيدى ۆيسە-مينيستر.
وسى ورايدا ءتىلشىمىز شەنەۋنىكتەن بۇل شەكتەۋ بيلىككە حالىقتىڭ ءۇنىن جەتكىزۋدە كەدەرگى بولماي ما دەپ سۇرادى.
“پەتيسيانىڭ ەڭ باستى ماقساتى – ازاماتتاردىڭ مەملەكەتتى باسقاۋ ىسىنە ارالاسۋى. حالىقتىڭ ۇندەۋى شاعىم ەمەس، ۇسىنىس رەتىندە قاراستىرىلادى. ال ەگەر ول ۇسىنىس زاڭعا قايشى كەلەتىن بولسا، قاراستىرىلمايدى”، – دەدى دانيار قادىروۆ.
ەسكە سالا كەتسەك، الماتىلىقتار قالا اكىمى ەربولات دوسايەۆتى جۇمىستان بوساتۋدى تالاپ ەتسە، ەل تۇرعىندارى ءمۋسيننىڭ وتستاۆكاعا كەتۋىن تالاپ ەتكەن پەتيسياعا قول قويعان بولاتىن.
