Endi róli oń jaqtaǵy kólikterdi ákelýge ruqsat joq
Normativtik quqyqtyq aktilerdiń elektrondy túrdegi etalondy baqylaý bankinde Ónerkásip jáne qurylys ministri Qanat Sharlapaevtyń buiryǵy jariialandy.
Onda buiryq «Saýda qyzmetin retteý týraly» zańnyń 17-baby 2-tarmaǵyna jáne 18-baby 1-tarmaǵynyń 2) tarmaqshasyna, Eýraziialyq ekonomikalyq odaq týraly sharttyń 29 jáne 47-baptaryna sáikes, sondai-aq 2014 jylǵy 29 mamyrdaǵy Eýraziialyq ekonomikalyq odaq týraly shartqa 7-qosymshanyń 10-bólimine sáikes ázirlengeni kórsetilgen.
Róli oń jaqta ornalasqan jeńil avtokólikterdi Qazaqstan aýmaǵyna bólshektelgen túrde 6 ai merzimge ákelýge tyiym salý engizilsin, - dep jazylǵan qujatta.
Ministrlik basqa memlekettik organdarǵa mynany habarlaýy kerek:
Memlekettik kirister komitetine osy buiryqtyń 1-tarmaǵy zańnamasynda belgilengen tártippen iske asyrý boiynsha Ulttyq qaýipsizdik komiteti Shekara qyzmetimen ózara is-qimyl kezinde baqylaýdy qamtamasyz etý týraly;
Temirjol jáne sý kóligi komitetine jáne «Qazaqstan temir joly» ulttyq kompaniiasy» AQ-ǵa (kelisý boiynsha) Qazaqstan zańnamasynda belgilengen tártippen osy buiryqtyń 1-tarmaǵyn iske asyrý jóninde sharalar qabyldaý týraly;
Saýda jáne integratsiia ministrligine belgilengen tártippen osy buiryqtyń 1-tarmaǵynda kórsetilgen tyiym salýdy engizý týraly Eýraziialyq ekonomikalyq komissiiaǵa habarlaý qajettigi týraly habardar etsin.
Buiryq resmi jariialanǵan kúninen keiin kúntizbelik 10 kún ótken soń qoldanysqa engiziledi.
