Qazaqstanda memlekettik kolledjderdiń sport zaldary, basseinderi, stadiondary jáne basqa da sport nysandary endi sabaqtan tys ýaqytta jergilikti turǵyndardyń paidalanýyna beriledi. Bul ózgeris sport infraqurylymyn tiimdi paidalanyp, buqaralyq sportty damytýǵa baǵyttalǵan, dep habarlaidy dalanews.kz.
Tiisti norma "Qazaqstan Respýblikasynyń keibir zańnamalyq aktilerine áleýmettik zańnamany jetildirý máseleleri boiynsha ózgerister men tolyqtyrýlar engizý týraly" zań aiasynda "Bilim týraly" zańǵa engizildi.
Buǵan deiin mundai múmkindik tek mektepterge ǵana qarastyrylǵan. Endi memlekettik kolledjderdiń de sport nysandary oqý protsesi aiaqtalǵannan keiin turǵyndardyń igiligine usynylady.
Oqý-aǵartý ministrliginiń málimetinshe, sport nysandaryn paidalanýǵa berýden túsken qarajat kolledjderdiń materialdyq-tehnikalyq bazasyn nyǵaitýǵa jumsalady. Atap aitqanda, qarjy sport zaldary men basseinderdi kútip ustaýǵa, jóndeý jumystaryna, jańa sporttyq jabdyqtar satyp alýǵa jáne infraqurylymdy jańǵyrtýǵa baǵyttalady.
Ministrlik bul ózgeris sport nysandarynyń tiimdi paidalanylýyna jol ashyp qana qoimai, buqaralyq sportty damytýǵa, salaýatty ómir saltyn nasihattaýǵa jáne azamattardyń dene shynyqtyrýmen turaqty ainalysýyna qolaily jaǵdai jasaýǵa yqpal etetinin atap ótti.
