Qazaqstanda oqýshylardyń tamaqtaný mázirine jylqy etin aptasyna eki ret, eki portsiiadan engizý usynylyp otyr. Bul týraly Premer-ministrdiń orynbasary, Ulttyq ekonomika ministri Serik Jumanǵarin depýtattyq saýalǵa bergen jaýabynda málimdedi, dep habarlaidy Dalanews.kz.
Aita keteiik, 2025 jyly 1 qyrkúiekten bastap elimizdegi barlyq bilim berý uiymdary úshin biryńǵai tamaqtaný standarty engizilgen edi. Atalǵan standartty ázirleý kezinde durys ári teńgerimdi tamaqtanýǵa qatysty halyqaralyq tájiribe men Dúniejúzilik densaýlyq saqtaý uiymynyń semizdik, qant diabeti jáne júrek-qan tamyrlary aýrýlarynyń aldyn alýǵa baǵyttalǵan usynymdary eskerilgen.
Jańa talaptarda kókónister men jemis-jidekterdiń úlesin arttyrý, tuz ben qant mólsheri joǵary ónimderden bas tartý, sondai-aq tátti sýsyndardyń ornyna sý, sút jáne qyshqyl sút ónimderin usyný kózdelgen. Sonymen qatar qujatta mektep mázirine jylqy etin aptasyna eki ret qosý jóninde usynys berilgen.
Sanitarlyq talaptar saqtalǵan jaǵdaida jylqy etin et taǵamdarynyń barlyq túrinde paidalanýǵa shekteý qoiylmaidy. Al naqty mázirdi árbir bilim berý uiymy óńirlik erekshelikterdi, ulttyq taǵam dástúrlerin jáne ónimderdiń qoljetimdiligin eskere otyryp, óz betinshe qalyptastyra alady.
Sondai-aq jaýapta áskeri qyzmetshilerdiń ratsionyna jylqy etin engizý máselesin Qorǵanys jáne Ishki ister ministrlikteri qoldaityny aitylǵan. Degenmen túpkilikti sheshim keshendi ǵylymi zertteýler júrgizilip, Qazaq taǵamtaný akademiiasynyń qorytyndysy alynǵannan keiin qabyldanady.
Budan bólek, 2024–2025 jyldary áleýmettik mekemeler jylqy etin jetkizýge shamamen 250 mln teńgege jýyq somaǵa 180-ge tarta kelisimshart jasaǵany kórsetilgen. Bul jylqy etiniń memlekettik satyp alý júiesinde keńinen qoldanylyp otyrǵanyn ańǵartady.
Úkimet ókilderiniń aitýynsha, qabyldanyp jatqan sharalar otandyq jylqy sharýashylyǵyn damytýǵa, jergilikti óndirýshilerdi qoldaýǵa jáne memlekettik mekemelerde salaýatty ári teńgerimdi tamaqtaný júiesin qalyptastyrýǵa baǵyttalǵan.
