Qazaqstanda psıhoemosıonaldy aýytqýy bar azamattar áskerı qyzmetke jiberilmeıdi. Bul týraly Qorǵanys mınıstrliginiń baspasóz qyzmeti málimdedi, dep habarlaıdy Dalanews.kz.
“Psıhoemosıonaldy turaqsyzdyǵy bar shaqyrylýshylar ásker qataryna alynbaıdy. (…) Elimizde sýısıdke beıimdilikti erte anyqtaýǵa baǵyttalǵan jańa PSY-RISK ádistemesi engizile bastady. Bul bastama áskerı qyzmetshilerdiń psıhologıalyq turaqtylyǵyn arttyryp, áskerdegi qaıǵyly jaǵdaılardyń aldyn alýǵa baǵyttalǵan”, – delingen sársenbide taratylǵan resmı aqparatta.
Atalǵan ádisteme Qorǵanys mınıstrliginiń áskerı psıhologtary tarapynan ázirlenip, 2025 jyly kóktemgi shaqyrylymda synaqtan sátti ótkizilgen.
“Nátıjesinde 470-ten astam jas jigitten sýısıdke beıim minez-qulyqtyń belgileri erte anyqtalyp, olar ásker qatarynan bosatyldy nemese qosymsha medısınalyq tekserýge jiberildi. Jańa júıe – kópsatyly psıhodıagnostıka tetigi. Ol bastapqy skrınıngten, tereńdetilgen psıhologıalyq zertteýden jáne qajet bolǵan jaǵdaıda psıhıatrıalyq saraptamadan turady. Negizgi maqsat: psıhoemosıonaldyq turǵyda áskerı qyzmetke daıyn emes azamattardy shaqyrylymnan shyǵarý”, – dep naqtylady mınıstrlik.
PSY-RISK ádistemesin engizý máselesi Qazaqstan Qarýly kúshteriniń Ulttyq áskerı-patrıottyq ortalyǵynda ótken vedomstvoaralyq jumys tobynyń otyrysynda negizgi taqyrypqa aınaldy. Top quramyna Qorǵanys, İshki ister, Densaýlyq saqtaý, Ǵylym jáne joǵary bilim mınıstrlikteriniń ókilderimen qatar, Ulttyq qaýipsizdik komıteti, Memlekettik kúzet qyzmeti jáne ózge de memlekettik qurylymdardyń mamandary kirdi.
Qorǵanys mınıstrliginiń Psıhologıalyq jáne áskerı-áleýmettik jumys basqarmasynyń bastyǵy Arman Qalyshevtiń aıtýynsha, bul bastama Úkimet tapsyrmasymen júzege asyp otyr jáne bolashaqta shaqyrylym naýqany aıasyndaǵy júıeli profılaktıkanyń bir bóligine aınalmaq.
“Bizdiń maqsatymyz – tek psıhologıalyq turǵydan álsizderdi iriktep alyp tastaý emes, sonymen qatar bolashaq áskerı bólimderdegi ujymdardy qaýip-qater týdyrýy múmkin jaǵdaılardan qorǵaý. Munda jeke adamnyń densaýlyǵy, ómiri jáne bólim ishindegi moraldyq ahýal týraly sóz bolyp otyr”, – dedi Qalyshev.
PSY-RISK ádistemesi elimizdiń barlyq óńirlerinde kezeń-kezeńimen engiziletin bolady.
Mınıstrlik ókilderiniń aıtýynsha, bul jańashyldyq irikteý sapasyn arttyryp, áskerdegi shtattan tys jaǵdaılardy azaıtýǵa jáne jas sarbazdardyń psıhıkalyq saýlyǵyn nyǵaıtýǵa aıtarlyqtaı úles qospaq.
