قازاقستاندا پسيحوەموسيونالدى اۋىتقۋى بار ازاماتتار اسكەري قىزمەتكە جىبەرىلمەيدى. بۇل تۋرالى قورعانىس مينيسترلىگىنىڭ باسپا ءسوز قىزمەتى مالىمدەدى، دەپ حابارلايدى Dalanews.kz.
“پسيحوەموسيونالدى تۇراقسىزدىعى بار شاقىرىلۋشىلار اسكەر قاتارىنا الىنبايدى. (…) ەلىمىزدە سۋيسيدكە بەيىمدىلىكتى ەرتە انىقتاۋعا باعىتتالعان جاڭا PSY-ريسك ادىستەمەسى ەنگىزىلە باستادى. بۇل باستاما اسكەري قىزمەتشىلەردىڭ پسيحولوگيالىق تۇراقتىلىعىن ارتتىرىپ، اسكەردەگى قايعىلى جاعدايلاردىڭ الدىن الۋعا باعىتتالعان”، – دەلىنگەن سارسەنبىدە تاراتىلعان رەسمي اقپاراتتا.
اتالعان ادىستەمە قورعانىس مينيسترلىگىنىڭ اسكەري پسيحولوگتارى تاراپىنان ازىرلەنىپ، 2025 جىلى كوكتەمگى شاقىرىلىمدا سىناقتان ءساتتى وتكىزىلگەن.
“ناتيجەسىندە 470-تەن استام جاس جىگىتتەن سۋيسيدكە بەيىم مىنەز-قۇلىقتىڭ بەلگىلەرى ەرتە انىقتالىپ، ولار اسكەر قاتارىنان بوساتىلدى نەمەسە قوسىمشا مەديسينالىق تەكسەرۋگە جىبەرىلدى. جاڭا جۇيە – كوپساتىلى پسيحودياگنوستيكا تەتىگى. ول باستاپقى سكرينينگتەن، تەرەڭدەتىلگەن پسيحولوگيالىق زەرتتەۋدەن جانە قاجەت بولعان جاعدايدا پسيحياتريالىق ساراپتامادان تۇرادى. نەگىزگى ماقسات: پسيحوەموسيونالدىق تۇرعىدا اسكەري قىزمەتكە دايىن ەمەس ازاماتتاردى شاقىرىلىمنان شىعارۋ”، – دەپ ناقتىلادى مينيسترلىك.
PSY-ريسك ادىستەمەسىن ەنگىزۋ ماسەلەسى قازاقستان قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا وتكەن ۆەدومستۆوارالىق جۇمىس توبىنىڭ وتىرىسىندا نەگىزگى تاقىرىپقا اينالدى. توپ قۇرامىنا قورعانىس، ىشكى ىستەر، دەنساۋلىق ساقتاۋ، عىلىم جانە جوعارى ءبىلىم مينيسترلىكتەرىنىڭ وكىلدەرىمەن قاتار، ۇلتتىق قاۋىپسىزدىك كوميتەتى، مەملەكەتتىك كۇزەت قىزمەتى جانە وزگە دە مەملەكەتتىك قۇرىلىمداردىڭ ماماندارى كىردى.
قورعانىس مينيسترلىگىنىڭ پسيحولوگيالىق جانە اسكەري-الەۋمەتتىك جۇمىس باسقارماسىنىڭ باستىعى ارمان قالىشيەۆتىڭ ايتۋىنشا، بۇل باستاما ۇكىمەت تاپسىرماسىمەن جۇزەگە اسىپ وتىر جانە بولاشاقتا شاقىرىلىم ناۋقانى اياسىنداعى جۇيەلى پروفيلاكتيكانىڭ ءبىر بولىگىنە اينالماق.
“ءبىزدىڭ ماقساتىمىز – تەك پسيحولوگيالىق تۇرعىدان السىزدەردى ىرىكتەپ الىپ تاستاۋ ەمەس، سونىمەن قاتار بولاشاق اسكەري بولىمدەردەگى ۇجىمداردى قاۋىپ-قاتەر تۋدىرۋى مۇمكىن جاعدايلاردان قورعاۋ. مۇندا جەكە ادامنىڭ دەنساۋلىعى، ءومىرى جانە ءبولىم ىشىندەگى مورالدىق احۋال تۋرالى ءسوز بولىپ وتىر”، – دەدى قالىشيەۆ.
PSY-ريسك ادىستەمەسى ەلىمىزدىڭ بارلىق وڭىرلەرىندە كەزەڭ-كەزەڭىمەن ەنگىزىلەتىن بولادى.
مينيسترلىك وكىلدەرىنىڭ ايتۋىنشا، بۇل جاڭاشىلدىق ىرىكتەۋ ساپاسىن ارتتىرىپ، اسكەردەگى شتاتتان تىس جاعدايلاردى ازايتۋعا جانە جاس ساربازداردىڭ پسيحيكالىق ساۋلىعىن نىعايتۋعا ايتارلىقتاي ۇلەس قوسپاق.
