Aqtóbede Agroónerkásiptik keshendegi memlekettik inspektsiia komitetiniń qalalyq aýmaqtyq inspektsiiasynyń basshysy Erlan Ibrashev qyzmettik ádepti buzǵany úshin sógis aldy, dep habarlaidy Dalanews.kz.
Memlekettik qyzmet isteri agenttiginiń Aqtóbe oblysy boiynsha departamentiniń málimetinshe, Ibrashev pen onyń áriptesi, bas maman A. Seitmuhambetova arasynda qyzmettik daý týyndaǵan. Departamenttiń basqarma bas mamany Daniiar Mahambetovtyń aitýynsha, Seitmuhambetova basshynyń kabinetine ruqsatsyz kirip, amandaspaǵan. Osy sátte ekeýara sózge kelip, daý ulǵaiǵan.
"Jiyn barysynda Seitmuhambetova Ibrashevten keshirim surady. Biraq Ibrashev ony qabyldamai, Seitmuhambetova "endi seniń aiaǵyńdy súieiin be?" dep mysqyldaǵan. Osydan keiin basshy ashýǵa boi aldyryp, "ei, sen, ne ekijúzdenip otyrsyń, aferistenbe!" degen sózder aityp, jiyn sońyna jetpei zaldan shyǵyp ketken", – dedi Mahambetov.
Ádep jónindegi keńeste Erlan Ibrashev bul áreketin densaýlyǵyna bailanysty kóńil kúiiniń nasharlaýymen túsindirdi.
"Ekijúzdi" dep aitqanym ras. Biraq "aferissiń" degen joqpyn, ol – burmalanǵan. Men tek "aferist adamnyń isin istep tursyń" dedim. Alǵashynda keshirim suraǵan áriptesim keiin mazaqtap, "seniń aiaǵyńa jyǵylaiyn ba?" degen soń, emotsiiama erik berip qoidym", – dep túsinikteme berdi Ibrashev.
Keńes músheleri Ibrashevtyń áreketi memlekettik qyzmetker etikasyna sai kelmeitinin aityp, ujym ishindegi qarym-qatynasty rettei almaǵany úshin oǵan sógis túrindegi tártiptik jaza qoldaný týraly sheshim shyǵardy.
